Prezidente KFP, Faustino Cardoso. Imajen TATOLI/Francisco Sony

DILI, 10 agostu 2021 (TATOLI)–Komisaun Funsaun Públika (KFP) enkoraja funsionáriu públiku tomak simu vasina kontra COVID-19, nune’e Timor-Leste bele deklara normalidade.

“Primeiru-Ministru fó orientasaun katak ita tenke tama ona normalidade foun, maibé atu tama ba ne’ebá presiza iha rekezitu, dahuluk Governu sei avansa ho kampaña vasinasaun kuandu atinje ona 70% bele deklara ona normalidade, signifika iha funsaun públika funsionáriu públiku sira, komisaun sei enkoraja oinsá maka avansa ba vasinasaun tanba ne’e kondisaun ida atu ita tama normalidada,” Prezidente KFP, Faustino Cardozo, relata, hafoin hasoru Primeiru-Ministru, Taur Matan Ruak, iha Rezidénsia Farol, tersa ne’e.

Prezidente KFP hatutan, komisaun sei esforsu hodi funsionáriu públiku sira bele simu hotu vasina.

Biban ne’e, Xefe Governu husu ba funsionáriu públiku sira atu mantein no kumpre medida prevensaun sira hodi evita propagasaun COVID-19, liliu variante foun delta.

Bazeia ba sistema informasaun saúde iha Ministériu Saúde, to’o iha tersa (10/08) tuku 10:00 dadeer, totál doze vasina ne’ebé fó ona ba populasaun elijível tinan 18 ba leten, hosi Dili atinje ona 68,9% iha doze dahuluk no doze daruak 45,8%, nune’e iha territóriu Timor-Leste doze dahuluk atinje ona 42,7% enkuantu doze daruak 15%.

Iha tersa ne’e, Sala Situasaun, Sentru Integradu Jestaun Krize (CIGC, sigla portugés) rejista kazu pozitivu COVID-19 foun hamutuk 138, rekuperadu na’in-15, no óbitu 29, enkuantu númeru ne’ebé baixa hela iha sentru izolamentu hamutuk 1.544 no  kumulativu kazu konfirmadu hahú marsu 2021 to’o agora hamutuk 11.717.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here