Membru Governu no Deputadu sira halo debate konfirmasaun deklarasaun Estadu Emerjénsia, iha sala plenária Parlamentu Nasionál, tersa (10/08). Imajen TATOLI/Egas Cristóvão

DILI, 10 agostu 2021 (TATOLI)--Ministru Prezidénsia Konsellu Ministru, Fidelis Manuel Leite Mangalhães, enkoraja sidadaun tomak atu partisipa iha kampaña vasinasaun hodi prevene-an hosi COVID-19 no variante foun delta.

“Ita agora iha situasaun perigu liu fali se ita kompara iha loron  loron 27 jullu, bainhira Governu hasoru ho Komisaun Permanente Parlamentu Nasionál hodi hamosu Rezolusaun ida hodi autoriza Prezidente Repúblika dekreta Estadu Emerjénsia dala-XVI tanba agora variante delta da’et ona, nune’e  Governu hahú aposta ba vasinasaun,” Ministru Fidelis hateten durante debate votu konfirmasaun ba pedidu deklarasaun Estadu Emerjénsia, iha sala plenáriu Parlamentu Nasionál (PN), tersa ne’e.

Governante ne’e konsidera, hafoin deteta ema hamutuk 12 iha munisípiu Ermera da’et variante delta, hamosu situasaun defisil ne’ebé presiza ultrapasa ho estratejia ka medida prevensaun ho kbiit legalidade hosi PN.

Notísia relevante: COVID-19: Óbitu ida, rejista variante Delta na’in-12 iha Ermera

Daudaun ne’e, Primeiru-Ministru, Taur Matan Ruak, tun diretamente lidera Komisaun Tékniku sira tanba situasuan ne’ebé Timor-Leste enfrenta presiza intervensaun ne’ebé forte liután.

“Ita haree situasaun ida ne’e la’ós bain-bain tanba iha preokupasaun no tauk iha momentu ne’e boot liu, kompara ho momentu hirak iha kotuk,” nia akresenta.

Tanba ne’e, Governu iha esperansa vasina nu’udar prevensaun di’ak ida ba sidadaun, ne’ebé daudaun hahú intensifika liután vasinasaun atu  hasa’e imunidade sidadaun sira hasoru vírus foun.

“Variante foun nia afeitu ba ema ne’ebé vasina doze kompletu ona ladún boot to’o ospitalizasaun ou mate, kompara ho maluk sira ne’ebé la vasina,” nia hatutan.

Virus foun bele espalla lalais litán, bainhira afeta ba ema sira ne’ebé seidauk vasina.

Nune’e, iha loron 27 jullu, Governu mai iha PN hodi aprezenta hanoin kona-ba pedidu no husu Prezidente Repúblika atu autoriza halo deklarasaun Estadu Emerjénsia dala XVI.

“Kbiit ne’ebé  Parlamentu Nasionál fó tuir konstituisonál haruka atu reforsa Governu hodi prepara estratejia hodi kontrola ba prevensaun luta kombate COVID-19 ho variante delta inklui variante sira seluk,” Ministru subliña.

Reprezentante Povu iha uma fukun aprova votu konfirmasaun ba estensaun Estadu Emerjénsia ba dala-XVI liuhosi votasaun ho rezultadu a-favór 34, kontra 0 no abstensaun 18.

Tuir Konstituisaun no Rejimentu PN katak bainhira Komisaun Permanente mak autoriza Estadu Emerjénsia ka Estadu esesaun hosi Komisaun Permanente, tenke hetan konfirmasaun hosi plenária.

Deputadu sira aprova votu konfirmasaun ne’e bazea ba Rejimentu PN artigu 120 (votasaun no forma ba autorizasaun) númeru 3 katak, autorizasaun ne’e bainhira fó hosi Komisaun Permanente, tenke hetan konfirmasaun hosi Parlamentu iha ninia reuniaun plenária dahuluk.

Konfirmasaun deklarasaun Estadu Emerjénsia ba dala-XVI ne’e bazeia ba Dekretu Prezidente Repúblika númeru 56/2021, 27 jullu, ne’ebé autoriza hosi Komisaun Permanente Parlamentu Nasionál nian liuhosi Eezolusaun Parlamentu Nasionál númeru 20/2021, 27 jullu liubá.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here