Xefe Departamentu CDE Baucau hosi IADE, Lígia Carlos de Almeida. Imajen TATOLI/Natalino Belo

BAUCAU, 10 agostu 2021 (TATOLI)–Xefe Departamentu Sentru Dezenvolvementu Emprezariál (CDE, sigla portugés) Baucau hosi Institutu Apoiu Dezenvolvementu Emprezariál (IADE), Lígia Carlos de Almeida, hateten, daudaun ne’e iha ona emprezáriu mak interese asesu programa garantia kréditu 3% ba mikro, pequena no média empreza.

Programa ne’e hanaran kréditu suave ne’ebé introdús hosi Governu liuhosi Ministériu Turizmu, Komérsiu no Indústria (MTKI).

“Hahú fulan-janeiru to’o agora, emprezáriu 12 mak rejista ona, ne’ebé na’in-10 sei prosesu conselling ba planu negósiu, enkuantu rua seluk finaliza no submete ona ba MTKI munisipál no daudaun sei iha prosesu ba nasionál hodi halo avaliasaun no verifikasaun hafoin rona rezultadu,” Xefe Departamentu CDE-IADE, informa ba Agência TATOLI, iha ninia knaar fatin, Villa nova, tersa ne’e.

IADE kolabora hamutuk ho MTKI no Banku Nasionál Komérsiu Timor-Leste (BNCTL, sigla portugés) hodi fó kréditu ho funan kiik ba negosiante sira, ne’ebé hala’o atividade negósiu iha setór produtivu hanesan turizmu, agrikultura no produsaun.

“Ninia prosesu durante fulan-neen sei livre selu obrigasaun, hafoin tama fulan-hitu mak selu, entaun ida-ne’e maka daudaun ami la’o hela,” nia akresenta.

Notísia relevante: MTKI-BNCTL asina akordu ho benefisiáriu garantia kréditu sosiál

Ministériu Koordenadór Asuntu Ekonómiku (MKAE) hamutuk ho IADE, antes ne’e buka identifika problema iha atividade ekonómika, nune’e iha fulan kotuk negosiante sira hahú hato’o difikuldade, ne’ebé maiória iha problema asesu kréditu iha banku.

Aleinde ne’e, CDE Baucau rejista ona negosiante sira ne’ebé hetan impaktu pandemia no implementasaun serka sanitária.

“Tanba urjente, entaun emprezáriu 10 resin de’it mak rejista iha semana ida nia laran. Ami rekolla informasaun hosi sira, liuliu problema ne’ebé sira hasoru durante implementasaun serka sanitária, hanesan rendimentu menus no negósiu paradu,” Lígia hatutan.

MKAE fó sai ona orientasaun ba parte munisipál atu tulun negosiante sira asesu kréditu liuhosi programa rekuperasaun ekonómika, nune’e atividade ekonomia iha rai-laran bele la’o ho di’ak no hasa’e kreximentu ekonómiku.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here