Xefe Suku Gildapil, Emílio Noronha (09/08). Imajen Tatoli/Sérgio da Cruz.

BOBONARO, 10 agostu 2021 (TATOLI)—Abitante mane kaben-na’in ida ho idade 39, hosi suku Lebos, postu administrativu Lolotoe, munisípiu Bobonaro, lakon durante fulan tolu ona iha liña fronteira.

“Ha’u-nia komunidade ne’e lakon fulan tolu ona. Nia sai hosi uma iha fulan maiu to’o agora seidauk fila ba uma no laiha informasaun ka kontaktu ho família. Durante ne’e komunidade buka-tuir mós la hetan,” Xefe suku Gildapil, Emiliano Noronha, hateten ba jornalista Agência Tatoli, iha Bairru Becora, Maliana tersa ne’e.

Notísia relevante:Lere husu populasaun iha fronteira koopera ho seguransa

Emiliano Noronha esplika, durante implementasaun serka sanitária, komunidade iha suku Gildapil barak mak laiha rendimentu.

Tanba ne’e, abitante ne’e sai hosi uma ho objetivu atu ba buka maek iha to’os atu ba faan iha merkadu, hodi sustenta nesesidade uma-laran, maibé planu ne’e la sai realidade tanba iha momentu ne’ebá kedan nia lakon to’o agora laiha informasaun ba família.

Autoridade lokál ne’e koordena ona ho Ofisiál Polísia Suku (OPS) no Komandante Unidade Patrullamentu Fronteira (UPF) kompaña Alfa postu altu Lebos, inklui família, organiza-malu ba buka iha to’os sira  ne’ebé pertense ba liña fronteira, maibé durante semana ida la konsege hetan informasaun no sinál ruma.

Oras ne’e daudaun, autoridade lokál hamutuk ho família koordena nafatin ho parte seguransa atu buka-tuir abitante ne’e no husu ba ema hotu atu hetan karik, bele informa ba parte família.

Abitante ne’e, iha oan na’in-haat ho nia kaben.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here