Ilustrasaun ospitalidade. Imajen/Espesiál

DILI10 agostu 2021 (TATOLI)–Sekretaria Estadu Formasaun Profesionál no Empregu (SEFOPE), liuhosi Xefe Departamentu Formasaun Profisionál, Leonor Bernardo, iha tersa ne’e, halo abertura formasaun iha Sentru Treinamentu Vokasionál Juventude (STVJ) Comoro.

Iha seremónia ne’e, Xefe Departamentu enkoraja formandu sira ne’ebé partisipa iha formasaun atu aproveita tempu ho di’ak hodi bele integra ba merkadu.

“Prosesu formasaun ne’e naruk, loloos itabo’ot sira hahú ona iha janeiru, maibé tanba formasaun ne’e realiza durante tinan ida no agora haree ba pandemia, maka ita realiza formasaun ne’e ba tempu badak, ne’ebé oportunidade ba itabo’ot sira tenke aprende didi’ak iha sentru ne’e molok ba iha indústria,” Responsável ne’e hateten liuhosi diskursu iha abertura formasaun, iha STVJ, Comoro, tersa ne’e.

Totál formandu sira ne’ebé tuir formasaun ba tinan ne’e hamutuk na’in90 iha área formasaun administrasaun, customer service, ospitalidade, no salesforce.

Nune’e, nia konsidera, formasaun ne’e hanesan bukae ida, hodi bele utiliza iha futuru hodi fó benefísiu ba an rasik no komunidade.

“Governu iha programa barak, tanba ne’e depende ba formandu sira atu asesu informasaun liuhosi meiu komunikasaun sosiál. SEFOPE iha programa interesante tebes ba itabo’ot sira, hanesan apoia ba ema graduadu ona hosi sentru formasaun iha área otelária, agrikultura, no área seluk tan, ne’ebé ami bolu auto empregu. Tanba ne’e, itabo’ot sira ne’ebé tuir formasaun tenke kria negósiu iha fatin hanesan iha Dili no fatin balun ne’ebé bele akomoda atividade hodi bele asesu merkadu no hetan rendimentu,” nia fó hanoin.

Programa seluk hosi SEFOPE mak estájiu nasionál ba graduadu sira ne’ebé ramata ona hosi eskola tékniku vokasionál no universidade iha área téknika.

Iha sorin seluk, Diretór STVJ Comoro, Norberto da Costa, informa, enkoraja formandu atu partisipa formasaun ho ativu nune’e bele aprende ho di’ak.

“Tanba formadór sira fasilita, orienta no hatudu dalan ba itabo’ot sira, maibé esforsu-an hosi pesoál idaidak, nune’e ami fiar katak itabo’ot sira iha ne’e, ho formasaun durante fulan-tolu to’o lima, sei hetan abilidade  di’ak atubele uza iha futuru oin mai,” nia dehan.

Jornalista : Nelia Fernandes

Editora     : Julia Chatarina

HAKEREK NO HATÁN

Please enter your comment!
Please enter your name here