Produtu Cesta Bázika iha bote-laran Imajen TATOLI/Antónia Gusmão

DILI, 09 agostu 2021 (TATOLI)—Xefe Suku Becora no Caicoli, Munisípiu Dili, husu Governu atu aselera distribuisaun programa Cesta Bázika ba reklamante sira tanba reklamante sira hein kleur liu ona.

Xefe Suku Becora, Postu Administrativu Cristo Rei, Munisípiu Dili, António da Silva husu Governu atu aselera prosesu Cesta Bázika ba reklamante ho totál ema na’in-200 iha suku refere.

Notísia Relevante: Governu verifika lista reklamante Cesta Bázika

“Ha’u-nia suku rasik iha reklamante hamutuk 200 hosi aldeia-13. Hosi totál reklamante ne’e ha’u haruka ona ba PAM Dili maibé to’o agora ha’u seidauk simu resposta katak bainhira mak halo atribuisaun Cesta Bázika ne’e. Nune’e, husu Governu atu aselera lalais prosesu ne’e,” António da Silva informa ba Agência TATOLI, iha Dili, segunda ne’e.

Xefe Suku Becora ne’e hateten, Governu presiza haree no aselera tanba hela fulan haat tán atu termina ona tinan 2021 tanba tinan oin Governu sei halo preparasaun ba eleisaun prezidensiál.

“Ha’u husu atu Governu tenke aselera lalais ona tanba kleur loos ona. Bainhira atribuisaun ne’e tarde mak ita labele nesesita ita-nia populasaun sira-nia nesesidade iha pandemia COVID-19 ne’e. Tanba ita hotu hatene katak tinan oin ema halo kampania no atividade ba preparasaun eleisaun prezidensiál nian,” nia fó hanoin ba Governu.

Lideransa komunitária ne’e informa ona Prezidente Autoridade Munisípiu Dili atu submete ona dadus reklamante ba parte relevante nune’e bele prosesa ona.

Entretantu, Xefe Suku Caicoli, Postu Administrativu Vera Crúz, Munisípiu Dili, Hipólito Marques Sarmento, informa iha suku refere iha reklamante 16 ne’ebé to’o agora seidauk iha resposta hosi hosi Governu kona-ba atribuisaun Cesta Bázika ne’e.

“Ita hein de’it, tanba planu no programa Cesta Bázika ne’e tanba surtu COVID-19 mak Governu atribui ba nia populasaun sira maibé seidauk ne’e ami labele hatene tanba ami só rekolla dadus no submete ba PAM Dili depois PAM Dili mak sei haruka tutan ba ministériu implementadór sira,” nia hateten.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here