Komunidade kontinua simu vasina AstraZeneca iha Sentru Saúde sira. Imajen Tatoli/António Gonçalves.

DILI, 09 agostu 2021 (TATOLI)-Bazeia ba monitorizasaun dahituk vasina nian hosi Forum Organizasaun Naun Governamentál Timor-Leste (FONGTIL)  ba  munisípiu hitu (7) hatudu katak taxa vasinasaun númeru aumenta, maibé munisípiu tolu, hanesan Ainaro, Aileu no Ermera taxa partisipasaun komunide nian simu vasina menus hosi 30%.

Ho baze rezultadu ne’e, FONGTIL husu  ba Ministériu Saúde atu servisu hamutuk ho autoridade komunitáriu hodi hasa’e konsiénsia komunidade kona-ba benefísiu hosi vasinasaun ba komunidade sira ne’ebé sei ta’uk atu simu vasina, liuliu komunidade sira hosi munisípiu ne’ebé taxa partisipasaun menus tebes.

Diretór ezekutivu FONGTIL, Daniel Santos do Carmo ba jornalista-sira liuhosi konferénsia  imprensa, iha salaun FONGTIL,  Caicoli, Dili, segunda ne’e,  relata katak munisípiu tolu ne’ebé taxa partisipasaun komunidade iha vasinasaun sei menus tanba mós falta informasaun kona-ba vantajen hosi vasina ne’e iha luta foun kombate pandemia COVID-19.

Dadus hosi FONGTIL nian hatudu Munisípiu Ermera komunidade ne’ebé simu ona vasina doze dahuluk atinje ona 14.1% no kompleta doze daruak foin atinje 1.6%.

Munisípiu Ainaro komunidade ne’ebé simu doze dahuluk 18.3%, no doze daruak foin atinje 2.6%. no  Munisípiu Aileu komunidade ne’ebé simu ona vasina dahuluk atinje 22.3% no vasina daruak foin atinje 2.6%.

Munisípiu hitu ne’ebé númeru taxa vasina sa’e mak hanesan, Dili komunidade ne’ebé simu ona vasina doze dahuluk atinje ona 63.3% simu doze daruak atinje 34.0%.

Munisípiu Baucau komunidade simu vasina doze dahuluk 32.3%, ba doze daruak atinje 3.0%, Munisípiu Lautem, komunidade simu vasina doze dahuluk 32.5% doze daruak nian atinje 2.7% no Munisípiu Manufahi komunidade simu vasina doze dahuluk 34.3% ba doze daruak 2.6%.

Munisípiu  Bobonaro komunidade ne’ebé simu vasina doze dahuluk 27.4% doze daruak 3.3%, Munisípiu Viquequqe komunidade simu vasina doze dahuluk 53.0% doze daruak 3.3% no Liquiça komunidade ne’ebé simu doze dahuluk 26.9% doze daruak 2.1%.

Jornalista : Arminda Fonseca

Editór       : Francisco Simões

HAKEREK NO HATÁN

Please enter your comment!
Please enter your name here