UPMA introdús sistema PAA orsamentál 2022 ba dirijente interministériál RAEOA. Imajen Tatoli/Abílio Elo Nini.

OÉ-CUSSE, 09 agostu 2021 (TATOLI)—Ekipa Unidade Planeamentu, Monitorizasaun no Avaliasaun (UPMA) introdús Sistema Planu Asaun Anuál ba kargu xefia no diretór sira iha Rejiaun Administrativa Espesiál Oé-Cusse-Ambeno (RAEOA).

Sekretária Rejionál ba Asuntu Finansa, Maria Eliza Maniquin, esplika formasaun ne’e hala’o hahú hosi loron segunda ho tersa, no partisipasaun sira mai hosi reprezentante Sekretáriu Rejionál sira hamutuk ema na’in 40, ne’ebé simu materia prinsipál kona-ba Planu Asaun Anuál nian nune’e ajusta hamutuk ba sistema orsamentasaun 2022.

“Ohin, simu formasaun Planu Asaun Anuál ba 2022, atu ita submete ba nasionál ho nune’e kolaborasaun servisu entre autoridade RAEOA ho Ministériu Finansa hamutuk Gabinete Primeiru Ministru nian mai fasilita formasaun ba dirijente interministeriál iha Oé-Cusse,” Maria Eliza Maniquin informa ba Agência Tatoli, iha aeroportu Rota do Sândalo, Palaban, suku Costa, sub-rejiaun Pante Makasar.

Iha fatin hanesan, formadór hosi UPMA, Ivan Alves, hateten atividade ne’e fasilita formasaun ba kargu xefia sira iha RAEOA kona-ba Planu Asaun Anuál orsamentál 2022 nian.

“UPMA mai iha Oé-Cusse halo diskusaun hodi fasilita téknika kona-ba oinsá mak ita bele halo Planu Asaun Anuál sira hanesan ne’e iha nivél rekursu, no iha matéria kona-ba estrutura programátika oinsá ita halo orsamentasaun kada programa, tanba ne’e importante ba dirijente sira presiza hatene,” nia dehan.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here