Kondisaun estrada suku Gildapil, postu administrativu Lolotoe, munisípiu Bobonaro. Imajen facebook.

BOBONARO, 09 agostu 2021 (TATOLI)—Populasaun iha suku Gildapil, postu administrativu Loloto’e, munisípiu Bobonaro, to’o oras-ne’e seidauk asesu estrada.

“To’o agora ha’u-nia suku la asesu estrada. Iha tempu udan komunidade enfrenta difikuldade boot, tanba konsidaun estrada grave tebes hanesan tahu makás transporte públiku paradu. Situasaun ne’e susar atu transporta produtu lokál ba merkadu Lolotoe no Maliana Villa,” Xefe suku Gildapil, Emílio Noronha, hateten ba jornalista Agência Tatoli, iha Maliana, segunda ne’e.

Notísia relevante:Estrada ligasaun Oe-leu ba Lolotoe besik kotu

Populasaun iha suku ne’e iha produtu lokál mak hanesan, talas, ai-farina, fehuk, koto, maek, kafé no produtu seluk tán.

“Suku ne’e iha eskola, postu saúde no Igreja. Maibé, iha tempu udan estudante-sira susar tebes atu partisipa iha prosesu aprendizazen, tanba sira hela dook-malu, sira tenke hakur mota no ponte laiha,” nia esplika.

Autoridade lokál ne’e fó-hanoin ba Governu, atu konsidera problema ne’e tanba populasaun enfrenta durante tempu naruk.

Suku Gildapil iha aldeia rua mak hanesan, Gildapil no Atus ho sub aldeia Sasa, ne’ebé iha populasaun hamutuk 1.457, mai hosi xefe família 354.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here