PAM Baucau, Olívio 'Bou Lesa' Freitas. Imajen TATOLI/Natalino Belo

BAUCAU, 09 agostu 2021 (TATOLI)–Pezidente Autoridade Munisípiu (PAM) Baucau, Olívio ‘Bou Lesa’ Freitas, konsidera presiza kontribuisaun líder komunitáriu sira hodi divulga importánsia vasina, tanba nu’udar aktu prevensaun COVID-19.

“Presiza líder suku sira-nia kontribusaun atu hatutan informasaun ba komunidade kona-ba importánsia prevensaun COVID-19, liuliu partisipasaun komunidade iha kampaña vasinasaun,” PAM Baucau hateten iha Sentru Konvensaun Baucau (CCB, sigla portugés), segunda ne’e.

Aleinde ne’e, Autoridade Baucau hamutuk ho Sala Situasaun, Sentru Integradu Jestaun Krize (CIGC, sigla portugés) nafatin halo kontrolu iha postu vijilánsia, atu tau atensaun ba komunidade seidauk kompleta vasina tenke submete ba teste swab atu antisipa variante foun delta tama iha rejiaun ne’e.

“Ema tama mai laiha kartaun ne’ebé hatudu seidauk vasina, ita halo kedas swab iha postu vijilánsia, ema ne’ebé vasina maka bele tama,”nia akresenta.

Tanba ne’e, Autoridade munisipál husu komunidade atu nafatin aplika regra prevensaun hanesan uza máskara, fase liman beibeik no labele halibur malu.

Nune’e, PAM hamutuk ho autoridade suku hamutuk 59 realiza sorumutuk ida atu divulga informasaun prevensaun COVID-19 inklui subsídiu ba liña frente, nune’e bele klarifika kona-ba importánsia vasinasaun no esplika direitu subsídiu.

Iha postu vijilánsia Vemasse, ekipa ne’ebé kompostu hosi CIGC Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), Bombeiru inklui pesoal saúde kontinua kontrola ema ne’ebé atu tama bá Baucau.

 Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here