Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, partisipa iha serimónia aniversáriu ASEAN nian ne’ebé selebra iha resintu Embaixada Indonézia nian iha Dili, segunda (09/08). Imajen Tatoli/Egas Cristovão

DILI, 09 agostu 2021 (TATOLI) – Reprezentante nasaun sira membru ASEAN nian iha Timor-Leste, segunda ne’e, iha Dili komemora loron aniversáriu ezisténsia ASEAN ba dala-54.

Nasaun sira membru ASEAN nian nia reprezentante iha Timor-Leste maka hanesan Malázia, Brunei Darussalam, Filipina, Tailándia no Indonézia. Sira  hirak-ne’e halibur malu iha resintu embaixada Indonézia nian iha Dili.

“Ohin ita komemora hamutuk loron ASEAN nian ba dala-54, ida ne’e hanesan tradisaun ida ba ASEAN hodi hasa’e  bandeira iha embaixada Indonézia nian. Ita Timor-Leste mai partisipa tanba ita prepara an hela atu tama ba ASEAN,” Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, informa ba Jornalista-sira hafoin partisipa serimónia ne’e.

Ministra ne’e iha esperansa loron ida Timor-Leste mós sei sai membru permanente iha organizasaun ne’e, tanba agora daudauk prepara hela rekizitu ne’ebé mak nasaun membru sira husu no hein de’it resposta.

“Ita atu tama ba ASEAN ne’e sira fó rekizitu tolu mai ita, hanesan ekonomia, polítika seguransa no sósiu kulturál. Sira ne’e hotu ita responde ona, so ekonomia mak iha buat barak uitoan hanesan komérsiu iha problema oioin tanba prioridade ASEAN nian mós tau importánsia liu ba ekonomia,” Ministra Adaljiza Magno afirma tan.

Ministra Adaljiza dehan, nasaun membru hotu la duvida atu Timor-Leste tama iha organizasaun ne’e, maibé prosesu mak sei lao to’o ohin loron.

ASEAN eziste  hanesan organizasaun ida iha loron 8 agostu 1967 iha Bangkok, Tailándia. Iha ne’ebé inisia no funda hosi nasaun lima (5) mak hanesan, Tailándia, Indonézia, Malázia Filipina no Singapura. Enkuantu Brunei Darussalam tama ba membru ASEAN iha 7 janeiru 1984, Vietname  iha 28 jullu 1995, Laos no Myanmar 30 abríl 1999.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here