Ministru Obra Públika, Salvador Eugênio Soares dos Reis Pires. Imajen TATOLI/Egas Cristóvão

DILI, 09 agostu 2021 (TATOLI)-Ministru Obra Públiku (MOP), Salvador Eugênio Soares dos Reis Pires, husu ba ajénsia no orgaun outónomu tutela atu tenta kumpre envolope fiskál ne’ebé Ministériu Finansa (MF) atribui, nune’e la hamosu orsamentu adisionál iha tinan fiskál 2022.

“Ita tenta laiha adisionál, maibé depende ba programa tanba iha aprezentasaun balun iha adisionál, maibé ami sei diskute hodi finaliza ida-ne’e. Ami espera katak kumpre pakote fiskál hodi la aprezenta ho adisionál,” Ministru Salvador hateten hafoin reuniaun aprezentasaun iha mini Kómite Revizaun Orsamentu tinan 2022, iha salaun konferénsia Otél JL. Villa, Ai-mutin, segunda ne’e.

MF atribui ona pakote fiskál 2022 ba MOP ho montante $157.140.777, ne’ebé fahe ba kategoria saláriu no vensimentu $2.773.899, bens no servisu $14.181.929, kapitál menor laiha, kapitál dezenvolvimentu $20.184.949 no transferénsia públika $120.000.000.

Ministru dehan, pakote fiskál ne’ebé fahe ona ba kada ajénsia no autónomu tutela ne’ebé benéfisia, bele kolaka ba kada programa sira, hafoin aprezenta ba Komisaun Revizaun Orsamentu Polítika (KROP).

Hafoin fahe pakote fiskál ba  ajénsia tutela sira hodi halo ezersísiu bele fahe ba kada programa ne’ebé kuaze kumpre hotu pakote fiskál.

Nune’e, sei haree pakote alokadu ba MOP inklui ajénsia no instituisaun autónomu tutela aloka ba área saida de’it, hafoin tama iha faze diskusaun iha KROP ne’ebé lidera hosi Primeiru-Ministru, Taur Matan Ruak, no ikus mai lori ba Parlamentu Nasionál (PN) atu halo diskusaun no aprovasaun.

Pakote fiskál 2022 ne’ebé fahe ona, kontinua fó prioridade ba área bee-moos, eletrisidade no extra nasionál to’o rurál.

Iha tinan ne’e, halo ona konkursu públiku reabilitasaun projetu ho distánsia kilómetru 324, ne’ebé daudaun ein kursu hela no prosesu iha Komisaun Nasionál Aprovizionamentu (CNA, Sigla Portugés) inklui manutensaun períodu rutina kilométru 800 resin.

Nune’e, sei halo reabilitasaun ba estrada hodi atinje meta ba estrada rurál iha territóriu nasionál.

Kona-ba eletrsidade, MOP liuhosi Eletricidade de Timor-Leste, Empreza Públika (EDTL, E.P) loke ona konkursu ba istalasaun iha suku 34 no suku balun ne’ebé seidauk sei tama iha faze daruak atu kompleta distribuisaun liña eletrisidad ba suku 76 ne’ebé seidauk asesu, suku ne’ebé asesu ona, maibé aldeia balun seidauk bele halo investimentu.

Aleinde ne’e, EDTL, E.P atu kontinua fó prioridade ba dijitaliazasaun sistema distribuisaun liña eletrisidade atubele halo kontrolu ho efisiente no kontrolu di’ak liután bainhira eletrisidade mate no foku ba konverte ba naturál gás ba sentrál elétriku sira.

Kona-ba bee-moos, Ministru dehan, Bee Timor-Leste, Empreza Públika (BTL, E.P) kontinua foku hasa’e kobertura fornesementu bee, ne’ebé daudaun halo hela projetu dezeñu detalladu iha postu administrativa sira hamutuk 35 iha tinan ne’e.

MOP hakarak hasa’e investimentu hodi atinje kobertura bee-moos ba sidadaun liuhosi foku ba projetu jestaun bee idróliku atu konserva bee-matan sira no bee kualidade ba konsumu umanu.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here