Ministériu Justisa (MJ) realiza formasaun kona-bá serbisu rejistu notariadu ba funsionáriu foun-sira, iha salaun MJ, segunda (09/08). Imajen Tatoli/Francisco Sony.

DILI, 09 agostu 2021 (TATOLI)—Ministériu Justisa (MJ), realiza formasaun téknika espesializada iha área rejistu prediál ba funsionáriu notariadu no konservadór na’in 37.

Formasaun ne’e hala’o tanba Diresaun Nasionál Serbisu Rejistu Notariadu (DNRN), koordena ho Diresaun Jerál Administrasaun Polítika Justisa.

Notísia relevante:Indika rai ba konstrusaun edifísiu PN, MJ hein relatóriu

Ministru Justisa, Manuel Cárceres da Costa, hateten formasaun ne’e iha ámbitu preparasaun ba notáriu no konservadór-sira, bainhira Governu aprova ona dekretu lei rejistu prediál no hetan promulgasaun hosi Prezidente Repúbliku (PR), hodi fó sertifikadu rai ba sidadaun.

Serbisu notariadu no konservadór mak sei emite sertifikadu rai ba sidadaun, nune’e formasaun ne’e  prepara matéria importante liu-liu kona-bá prosedimentu-sira.

“Formasaun hanesan meiu ida atu aumenta koñesimentu ba profisaun ne’ebé ita bo’ot sira hala’o. Tanba ne’e, aproveita ho didi’ak hodi bele implementa iha serbisu,” Manuel Cárceres, hateten iha diskursu abertura formasaun ne’ebé hala’o iha sala auditória MJ, Caicoli, segunda ne’e.

Ministru ne’e hatutan, besik tinan 20 la tau atensaun ba formasaun iha área notariadu no konservadór, nune’e formasaun ne’e hahú etapa foun iha serbisu Ministériu-nian, hodi kapasita funsionáriu ba emisaun sertifikadu títulu rai ba sidadaun.

Diretór Nasionál DNRN, Crisogno da Costa, hateten matéria  ba formasaun ne’e sei kobre koñesimentu baze legál hanesan aprezentasaun kuadru sistema legalizasaun direitu kona-bá  imóveis, analiza norma konstitusionál  direitu  propriedade  imóveis, rejime jerál  ba definisaun titularidade bens móveis (lei terras), transmisaun pedidu rejistu prediál, lei direitu reál, konstituisaun, lei komisaun rai, kódigu sivíl no seluk tán.

Formasaun durante loron sia, hahú hosi 09 to’o 18  agostu tinan ne’e, ne’ebé partisipa hosi  formandu na’in 37, kompostu hosi konservadór no notariadu 21, jurísta hosi Ministériu no funsionáriu DNRN na’in 16.

Formadór  maka asesór internasionál na’in ida ho  asesór nasionál ida hosi Ministériu Justisa.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here