Ministru Agrikultura no Peska, Pedro dos Reis, entrega sertifikadu ba graduadu, iha salaun MAP, Comoro, segunda (09/08). Imajen TATOLI/Natalino Costa

DILI, 09 agostu 2021 (TATOLI)–Ministériu Agrikultura no Peska (MAP) atribui sertifikadu ba estudante bolseiru na’in-neen, ne’ebé finaliza ona estudu iha área ensinu vokazionál área florestál iha Indonézia.

Ministru Agrikultura no Peska, Pedro dos Reis, hateten, estudante hirak ne’e hetan bolsu estudu hosi Governu Indonézia rasik.

“Governu loke odamatan nafatin, tanba ne’e, ita husu ba Señor Embaixadór hamutuk ho Ministériu Ambiente no Florestál Indonézia, karik bele loke tan oportunidade barak  ba ita-nia ema atu ba estuda iha área ne’e tanba ita-nia rai ne’e iha guarda florestál hamutuk 85, entaun ita presiza tebes aumenta sira-nia kapasidade, atu nune’e ba futuru bele halo netik buat ruma,” Ministru dehan ba Agência TATOLI, hafoin atribuisaun sertifikadu ba graduadu florestál, ne’ebé realiza iha salaun MAP, Comoro, segunda ne’e.

Iha fatin hanesan  Diretór Jerál Planta Industriál, Raimundo Mau, hateten, bolsu estudu ne’e hosi akordu kooperasaun ne’ebé Governu Timor-Leste no Indonézia asina iha tinan 2015 atu kapasita eskola vokasionál florestál.

“Kada tinan ita haruka ita-nia estudante na’in-lima, maibé agora na’in-15 maka fila ona, no ohin ita fahe sertifikadu ba graduadu neen,” nia tenik.

Tuir Dirijente ne’e, graduadu ne’ebé ramata ona estudu bele envolve-an iha área florestál iha Diresaun Jerál Florestál no Planta Industriál no daudaun prepara tan kandidatu atu frekuenta estudu iha área hanesan.

“Ohin sira prepara tan estudante foun na’in-10 ba tinan 2021 atu halo estudu iha área florestál iha java oeste no Sumatra, maibé tanba situasaun pandemia, entaun parte Indonézia trava ema estrajeiru tama ba rejiaun, maibé ita halo koordenasaun ho parte Ministériu Ambiente no Florestál Indonézia hodi bele hetan aula virtuál, tanba ne’e agora loron-loron estudante na’in-10 tuir daudaun no akompaña hosi ofisiál florestál sira,” nia haktuir.

Aleinde ne’e, Governu kontinua buka dalan hodi graduadu iha ensinu vokasionál kontinua estudu iha nível lisensiatura.

Embaixadór Indonézia iha Timor-Leste, Sahat Sitorus. Imajen TATOLI/Natalino Costa

Iha biban hanesan, Embaixadór Indonézia iha Timor-Leste, Sahat Sitorus, hateten, kooperasaun entre país rua sei kontinua tanba akodu ne’e rasik kada tinan-lima hotu tenke renova.

“Nune’e, parte Embaixada Indonézia sei buka fatin ba graduadu sira hodi bele kontinua estudu iha nível a’as, nune’e bele finaliza estudu hodi dezenvolve no asegura área florestál iha Timor-Leste ho di’ak,” nia hatutan.

Nune’e mós, estudante graduadu ensinu vokasionál área florestál, Adriano dos Reis, apresia no kontente tanba hetan fiar, maski hasoru ho dezafiu oin-oin, maibé bele finaliza estudu ne’e ho di’ak.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here