Vice-Ministru Administrasaun Estatál, Lino de Jesus Torrezão. Imajen Tatoli/Antónia Maia Gusmão.

DILI, 09 agostu 2021 (TATOLI)—Governu liuhosi Ministériu Administrasaun Estatal (MAE) lideradu Miguel Pereira de Carvalho, seidauk deside data atu fó pose ba Prezidente Autoridade Munisípiu (PAM) Dili ne’ebé  foun.

Vise-Ministru Administrasaun Estatál, Lino de Jesus Torrezão, informa data ba pose seidauk deside tanba sei iha atividade importante ne’ebé presiza konklui.

Notísia Relevante: Governu seidauk fó pose ba PAM Dili-Administradór Manufahi

“Konsellu Ministru delibera tiha ona Guilhermina Filomena ba Prezidente Autoridade Munisípiu Dili nian. Maibé toma pose ami seidauk bele organiza ka deside tanba ami sei iha atividade importante ne’ebé ami tenke konklui lai, hanesan orsamentu inklui pandemia COVID-19,” Lino de Jesus Torrezão informa ba Agência TATOLI, iha Novo Turismo, Lecidere, Dili, segunda ne’e.

Governante ne’e hateten, posibilidade iha fulan-agostu nia-laran bele konklui ona hafoin deside data ba pose.

Vise-Ministru Administrasaun Estatal ne’e urgullu tanba PAM Dili foin mak feto ida-ne’ebé lidera sidade metropolitanu.

“Primeira-vez feto ida mak bele lidera sidade metropolitanu katak buat ne’ebé mak ita hakarak fó opurtunidade ba feto no agora feto mak sai PAM Dili foun no ida-nee’sai istória ida ba ita,” nia akresenta.

Entretantu Xefe Suku Madohi, Postu Administrativu Dom ALeixo, Munisípiu Dili, Bernadino Fereira, perokupa estabilidade iha Munisípiu Dili no espera PAM foun ne’e bele rezolve problema ne’ebé durante komunidade Dili enfrenta.

“Tanba ita haree aspetu iha baze, ita menus estabilidade nasionál. Tanba durante ne’e ami autoridade sira esforsu maibé ami laiha garante tanba desizaun polítika kona-ba antesipasaun ne’e autoridade munisipál nian,” nia hateten.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here