Deputada Elvina Sousa de Carvalho. Imajen TATOLI/Evaristo Soares Martins.

DILI, 09 agostu 2021 (TATOLI)—Deputada Bankada Partidu Demokrátiku (PD), Elvina Sousa de Carvalho, hateten feto no mane iha obrigasaun hanesan iha moris família, kulturál, ekonómiku no polítiku nia laran maibé atu sai polítiku tenke prepra-an didi’ak, nune’e serbí partidu no nasaun ho kualidade.

Elvina Sousa de Carvalho hatuutan, feto ne’ebé ideál atu sai líder ne’e depende ba an rasik no partidu polítiku sira, tanba partidu polítiku sira iha meiu rasik atu halo rekrutamentu ba feto sira atu tuur iha kargu polítika iha nível foti desizaun.

“Ha’u hanoin lei partidu polítiku regula ona maibé fila-fali ba vontade partidu polítiku sira. Se vontade partidu polítiku sira atu envolve feto sira ho porsaun boot iha nível foti desizaun ne’e di’ak maibé tenke selesiona ho didi’ak. Ida-ne’e depende ba partidu nia sensibilidade ba asuntu jéneru. Iha lei partidu polítiku rekere 30% maibé fila-fali ba sensibilidade partidu polítiku sira,” Prezidente Organizasaun Feto Partidu Demokrátiku ne’e informa ba Agência TATOLI, iha resintu uma fukun, segunda ne’e.

Reprezentante povu ne’e observa, dezenvolvimentu feto nian iha polítika durante ne’e hatudu vontade maibé tenke kontinua haka’as-an hodi sai polítiku ida ho mais kualifikada nune’e Governa nasaun halo povu hotu sente kontente.

Nune’e, hahú agora ba oin feto sira tenke partisipa ativu iha atividade polítika sira hotu no tenke prontu simu responsabilidade iha partidu laran, maibé partidu mak tenke sensibilidade ba asuntu jéneru.

“Ha’u hanesan feto ne’ebé ativu iha polítiku, ha’u hakarak husu ba feto maluk sira hotu ne’ebé mak hakarak halo mudansa iha prosesu dezenvolvimentu nasionál, liu-liu iha nível foti desizaun tenke kapasita-an uluk liuhosi setór públiku no setór privadu sira,” nia dehan.

Nia hatutan, partidu polítiku sira mós iha meiu rasik atu halo rekrutamentu no sira mós iha organizasaun feto nian.

Tuir nia, durante ne’e partidu polítiku sira iha meiu rasik hodi halo selesaun ida-ne’ebé rigorozu atubele hili nia ema sira tanba Konsituisaun RDTL artigu 16 no 17 no mós lei partidu polítiku mós previstu.

“Kualkér feto hotu ne’ebé hakarak partisipa ativu iha polítika tenke prepara-an, inklina-an ba iha partidu atubele halo mudansa, liu-liu iha nível foti desizaun. Ha’u hanoin iha feto barak hakarak sai polítiku maibé desizaun ne’e partidu mak deside nomó povu mak deside. Se to’o ba iha eleisaun mak povu deside ema ida-ne’ebé sira fó fiar, ida-ne’e mak sira tenke simu durante tinan-lima,” nia hateten.

Tuir Konstituisaun RDTL Artigu 17 (Igualdade ba feto no mane), katak feto no mane iha direitu no obrigasaun hanesan iha moris família, kulturál, sosiál, ekonómiku no polítiku nia laran.

Nune’e mós Lei Partidu Polítiku númeru 2/2016, 3 fevereiru, artigu 8 kona-ba prinsípiu promosaun feto no rejuvenesimentu partidu, númeru 1 esplika, partidu polítiku sira tenke promove partisipasaun feto sira espesialmente iha órgaun diresaun partidu nian.

Númeru 2 hosi lei ne’e hatutan, partidu polítiku sira bele halo promosaun hanesan ba sidadaun ne’ebé ho idade joven entre tinan 17 no tinan 35 iha órgaun diresaun partidu nian.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here