Komunidade iha aldeia Manuimpena, suku Lalisuk, sub-rejiaun Pante Makasar simu vasina. Imajen Tatoli/Abilio Elo Nini.

OÉ-CUSSE, 09 agostu 2021 (TATOLI)—Rejiaun Administrativa Espesiál Oé-Cusse-Ambeno (RAEOA) rejista kazu pozitivu 39 no propoin aplika serka sanitária ba área Padiae, suku Lalisuk, sub-rejiaun Pante Makasar.

Notísia Relevante: COVID-19: Pozitivu tolu, autoridade RAEOA aplika konfinamentu domisiliáriu

Ekipa Prevensaun no Mitigasaun COVID-19 iha RAEOA deteta kazu positivu COVID-19 hamutuk na’in-39, iha sub-rejiaun Oésilo, suku Bobometo, aldeia Saben, sub-rejiaun Pante Makasar iha suku Naimeco no balu iha suku Lalisuk, aldeia Padiae.

Nune’e iha loron segunda 09 agostu, autoridade RAEOA propoin ona karta pedidu ba Governu sentrál atu aplika serka sanitária ba suku Lalisuk, aldeia Padiae sub-rejiaun Pante Makasar

“Ita-nia pesoál saúde sira kontinua halo teste swab ba área afetadu sira hanesan iha suku Bobometo aldeia Saben, no suku Naimeco aldeia Baqui, inklui suku Lalisuk aldeia Padiae. Fatin sira-ne’e deteta kazu kontinua aumenta ba na’in-39, hein hela rezultadu teste-swab na’in-17 no rekupera ona na’in-35,” Sekretáriu Rejionál ba Asuntu Saúde, Manuel da Costa, informa ba Agênsia Tatoli iha Santa Rosa, suku Costa, sub-rejiaun Pante Makasar, segunda ne’e.

Dirijente saúde ne’e dehan, kazu positivu na’in-39 ne’e deteta iha suku Naimeco hamutuk na’in-12, iha loron 08 agostu, balun iha Saben aumenta tán iha Padiae, no daudaun ne’e kumpre hela iha sala izolamentu iha portu Kitahara-Mahata.

Tanba kazu positivu COVID-19 aumenta beibeik, nune’e autoridade RAEOA liuhosi Sekretáriu Rejionál Asuntu Saúde relata ona pedidu ba nasionál hodi propoin aumenta serka sanitária iha iha suku Lalisuk, aldeia Padiae.

“Profisionál saúde deteta sira iha postu saúde no sentru saúde sira, primeiru foti hosi konfirma ho PCR hatudu rezultadu pozitivu, ne’ebé kazu aumenta beibeik, entaun ohin ita halo karta pedidu ba Governu sentrál ita propoin atu aplika serka sanitária ba iha suku Lalisuk aldeia Padiae de’it,” nia relata.

Entretantu, totál pasajeiru kumpre hela kuarentena obrigatoriu iha RAEOA hamutuk na’in-60, kumpre ona kuarentena obrigatoriu hamutuk na’in-1.555 no kumpre ona auto-kuarentena hamutuk na’in-1.615.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here