Sorumutuk entre Líder komunitáriu, Prezidente Autoridade munisípiu Baucau no Diretór Jerál Desentralizasaun Admistrativa, iha CCB, segunda ( 09/08). Imajen TATOLI/Natalino Belo

BAUCAU, 09 agostu 2021 (TATOLI)–Diretór Jerál Desentralizasaun Admistrativa hosi Ministériu Admistrasaun Estatál (MAE), Belarmino Neves, hateten, tempu badak sei realiza kampaña vasinasaun masál durante loron 10 nia laran.

“Iha loron 11 to’o 21 fulan ne’e, sei realiza vasina masál iha admistrasaun munisipál Baucau, ba ema adultu ho idade 18 ba leten,” Diretór Jerál informa iha Sentru Konvensaun Baucau (CCB, sigla portugés) segunda ne’e.

Tanba ne’e, realiza sorumutuk entre líder komunitáriu, Diretór Jerál Desentralizasaun Admistrativa no Prezidente Autoridade munisípiu Baucau, no entidade relevante, hodi ko’alia kona-ba prevensaun COVID-19 no mobiliza komunidade atu partisipa másimu iha kampaña vasinasaun no subsídiu ba liña frenti.

Biban ne’e, Dirijente ne’e husu ba líder komunitáriu sira, ne’ebé konsidera nu’udar liña frente, atu haklaken informasaun ba komunidade sira no mobiliza komunidade partisipa vasina tuir kalendáriu ne’ebé hatuur ona hosi Governu sentrál.

Belamino konsidera, líder komunitáriu sira iha papél importante atu hatutan informasaun kona-ba importánsia vasina iha ámbitu ne’e hodi hamenus risku propagasaun COVID-19 iha komunidade.

“Task force iha nível komunitária mak Xefe suku, aldeia, delegadu, no Ofisiál Polísia Suku (OPS) sira, ne’ebé ita fó knaar hodi responsabiliza Estadu nia ema iha nível baze, atu hatutan informasaun ne’ebé loloos no motiva ita-nia komunidade atu kumpre regra protokolu COVID-19, tuir swab no vasina,” nia akresenta.

Daudaun ne’e munisípiu hotu kontinua mantein impoin regra protokolu saúde, hanesan mós iha Baucau, ekipa vijilánsia iha Vemasse kontinua pasa revista dokumentu vasina.

“Ita hakarak ema hotu bainhira halo viajen, kuandu seidauk vasina nia tenki swab, kuandu lae ekipa labele autoriza tama rejiaun ida,” nia hatutan.

Iha sorin seluk, Governu rasik sei fó insentiva ba líder suku, hahú loron 01 jullu, tuir dekretu lei 11/2021 kona-ba insentiva ba líder komunitáriu sira ne’ebé sai nu’udar ekipa liña frente iha suku.

Objetivu hosi insentiva ne’e atu tulun líder komunitáriu sira bainhira halo serbisu divulga informasaun kona-ba prevensaun COVID-19 no kampaña vasinasaun.

“Hamutuk 8.000 resin, sira ne’e hotu hetan insentiva maski kiik maibé Estadu sente katak iha importánsia atu ajuda sira atu hala’o knaar,” Belarmino hatutan.

Iha fatin hanesan, Xefe suku Soba, postu admistrativu Laga, munisípiu Baucau, Francisca Monica de Fátima Soares, prontu atu sosializa kona-ba importansia prevensaun no kampaña vasinasaun iha nia suku.

Maski nune’e, nia sente triste tanba montante insentiva ba ekipa liña frente iha suku la hanesan.

“Ami triste oituan, insentiva ba Sekretária ne’ebé mak nu’udar liña frente, loron-loron serbisu iha sede suku maibé hetan deit $20 no ba OPS ne’ebé bainhira deteta kazu ruma sempre envolve sira, maibé iha dekretu-lei ne’e OPS laiha, ida-ne’e mak halo ami ladún kontente,” Francisca hateten.

Tuir nia, sosializasaun kona-ba prevensaun COVID-19 no kampaña vasinasaun hahú kedas iha tinan 2020 tanba iha koordenasaun servisu ho Organizasaun Naun Governamentál (ONG) no sentru saúde Laga.

Dekretu-lei númeru 11/2021 kona-ba insentiva ba líder komunitáriu sira ne’ebé sai nu’udar ekipa liña frente iha suku, ba Xefe suku hamutuk $100, Sekretáriu suku $20, Xefe aldeia no lian-na’in delegadu hamutuk $40.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here