Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

DILI, 09 agostu 2021 (TATOLI)—Ministériu Obra Públika (MOP) planeia iha tinan oin, atu transfere orsamentu ba Eletricidade de Timor-Leste, Empreza Públika (EDTL, E.P) no Bee Timor-Leste, Empreza Públika (BTL, E.P) ho totál millaun $106, hosi pakote fiskál tinan 2022 ho montante $157.140.777.

“Ami-nia planu atu transfere orsamentu ba EDTL, E.P hamutuk millaun $90 no ba BTL,E.P millaun $16 atubele kobre kombustível ba sentrál elétrika no hasa’e kobertura fornesementu bee ba sidadaun sira,” Ministru Obra Públika (MOP), Salvador Eugênio Soares dos Reis Pires, hateten, iha Otél JL-Villa, Fatuhada, segunda ne’e.

Orsamentu ne’e atu fasilita EDTL, E.P loke konkursu públiku ba instalasaun liñ eletrisidade iha suku 34 ne’ebé tama iha faze daruak, atu kompleta distribuisaun liña eletrisidade ba suku 76 ne’ebéseidauk asesu, suku ne’ebé asesu ona, maibé aldeia balun seidauk bele halo investimentu.

Nune’e, empreza estat ne’e kontinua fó prioridade ba dijitaliazasaun sistema distribuisaun liña eletrisidade atubele halo kontrolu ho efisiente no di’ak liután bainhira eletrisidade mate no foku halo konverte ba naturál gás ba sentrál elétrika sira.

“Ita haree kada tinan EDTL, E.P rekolla reseita millaun $33 no espera katak tinan oin bele di’ak liután tanba tinan ne’e sira halo akizasaun kontador pre-pagu 100.000 resin. Se ida-ne’e mak konsege instala hotu no halo kontrolu ba konesaun ilegál sira ba kliente sira ne’ebé seidauk hetan konesaun pre-pagu, ha’u hanoin sira-nia reseita bele aumenta iha tinan oin,” nia garante.

Governate ne’e konsidera orsamentu ne’ebé atribui ba EDTL,E.P bele sustenta sira-nia operasaun iha tinan oin, ne’ebé hahú foku ba instalasaun liña distribuisaun eletrisidade, aumentu instalasaun  suku, instala pre-pagu foun, kontrolu konesaun ilegál sira no  hadi’a sistema  liña distribuisaun sira atu prevene ahi-mate.

Tuir Ministru, alokasaun millaun $16 ba BTL, E.P sufisiente no bainhira orsamentu anuál la to’o ba Orsamentu Jerál Estadu (OJE) 2023 maka bele haree fali orsamentu foun, enkuantu Governu mós iha fundu rezerva kontijénsia ne’ebé iha nesesidade previstu bele konkorre.

“Ita hakarak BTL, E.P kontinua promove projetu ka hasa’e kobertura ba ema asesu bee, liliu iha kapitál munisípiu sira no postu administrativu sira tanba área rurál tama iha Programa Dezenvolvimentu Nasionál Suku (PDNS), ne’ebé responsável iha Ministériu Administrasaun Estatál (MAE),” nia tenik.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here