Funsionáriu EDTL hadi’a hela liña eletrisidade ne’ebé avaria. Imajen/Doc. Tatoli

LIQUIÇA, 08 agostu 2021 (TATOLI)–-Xefe Suku Ulmera, Postu Administrativu Bazartete, Munisipiu Liquiça, Martinho Correia, hateten kuaze 90% populasaun Ulmera asesu ona ba liña eletrisidade.

Notísia Relevante: Uma-kain 70 iha Ulmera seidauk asesu eletrisidade

“Iha Ulmera ne’e komunidade 90% mak asesu ona ba eletrisidade. 10% hanesan ne’e mak seidauk maibé iha tempu besik bele kompleta ona ba 100%, tanba ita-nia Governu mós esforsu hela,” Xefe Suku ne’e hateten ba Agência Tatoli iha Ulmera, domingu ne’e.

Nia dehan, 10% ne’ebé mak seidauk asesu kompostu hosi aldeia Terlau balu, Titisari balu no Manemuno balun mak seidauk asesu ba eletrisidade.

Aleinde ne’e, nia haktuir, aleinde populasaun asesu eletrisidade, iha Suku Ulmera mós populasaun kuaze 95% mak asesu ona bee-moos.

“Bee mos komunidade ita bele dehan 5% de’it mak seidauk asesu. Komunidade hela iha parte Nasuta mak seidauk maibé ita esforsu hela para oinsá bele dada bee-mos to’o ba komunidade sira-ne’e,” Xefe Suku ne’e dehan.

Tuir dadus ne’ebé iha, populasaun iha Ulmera hamutuk na’in 200 resin kompostu hosi aldeia sia (9) mak hanesan Terlau, Nauner, Fatubessi Lolo, Neran, Manemuno, Manemori, Titisari, Esirat no Libaloa no maioria komunidade iha Suku Ulmera 70% mak moris hanesan vida agrikultór.

Jornalista : Hortencio Sanchez

Editór       : Cancio Ximenes

HAKEREK NO HATÁN

Please enter your comment!
Please enter your name here