Negosiante Maria Caub, hosi suku Bobokase, faan produtu lokál iha Mercadu Numbei, sábadu (07/08/21). Imajen Tatoli/Abílio Elo Nini.

OÉ-CUSSE, 07 agostu 2021 (TATOLI)—Durante Implementasaun Estadu Emerjénsia (EE), produtu lokál iha merkadu Numbei, suku Costa, sub Rejiaun Pante Makasar, Rejiaun Administrativa Espesiál Oé-Cusse Ambeno (RAEOA), la folin tanba movimentu paradu.

Maria Caub (54), hosi aldeia Fatubijae, suku Bobokase, ne’ebé baibain faan produtu lokál hanesan sukaer, nuu-maran, ai-manas, ai-farina, tomate no modo-tahan, haktuir durante Estadu emerjénsia la hetan osan, tanba ema mak laiha duni atu hola.

Notísia relevante:Governu impoin serka sanitária ba suku rua iha RAEOA

“Ami faan iha merkadu ne’e desde uluk. Maibé, desde aplikasaun Estadu emerjénsia produtu la folin. Ami mai iha ne’e dadersan, tuur hein to’o fali lorokraik maibé ema la hola no ami lori fila produtu-sira ba uma. Situasaun ne’e halo ami susar liu tan atu atende ami nia nesesidade lorloron, inklui osan atu selu oan sir aba eskola,” Maria Caub, hateten ba jornalista Agência Tatoli, iha merkadu Numbei, sábadu ne’e.

Iha fatin hanesan Cesília Ulan, hosi suku Nipani ne’ebé faan modo-tahan, preokupa kona-bá fatin faan-nian tanba kondisaun merkadu la dignu.

“Merkadu iha Oé-Cusse ne’e ida de’it. Tanba ne’e, ami lori produtu atu buka netik 0,10 sentavu, maibé ema balun mai lebele hola tanba dehan modo fo’er, rai rahun barak,” nia preokupa.

Tanba ne’e, nia husu ba Autoridade RAEOA atu konsidera preokupasaun ne’e, tanba tinan barak ona populasaun hala’o negósiu iha fatin ne’e la dignu.

Agostino Tani hosi aldeia Kutete, suku Costa, hateten nia parte respeita regulamentu Organizasaun Mundiál Saúde (OMS), no bele sulan-an iha uma, maibé dalaruma bele mate hamlaha, tanba ninia moris depende ba faan produtu lokál hanesan modo-tahan, ai-farina, ai-manas no seluktan.

“Ami faan iha merkadu kumpri regulamentu, ami sempre fase liman, uza máskara maibé ami-nia sasán la folin tanba ema laiha atu hola. Oinsa ma kami bele moris,”  nia espresa.

Situasaun ne’e dala barak halo Agostino Tani  tenke troka de’it produtu ne’ebé nia faan ho produtu seluk ne’ebé presija hanesan modo tahan troka ho foos, masin no seluk tan.

Jornalista: Abílio Elo Nini

Editór: Cipriano Colo

HAKEREK NO HATÁN

Please enter your comment!
Please enter your name here