Serimónia judisium IOB 2021. Imajen Tatoli/Egas Cristóvão.

DILI, 07 agostu 2021 (TATOLI)—Institute of Business (IOB), realiza serimónia judisium ba estudante finalista hosi fakuldade ekonomia negósiu no fakuldade otelaria no turizmu, hamutuk na’in 254, ho tema: ‘Imi nia susesu mak ami-nia esperansa’.

Reitór IOB, Pedro Miguel Barreto Ximenes, husu finalista-sira atu sai ema ne’ebé la’ós matenek de’it iha kakutak no iha títulu, maibé importante liu mak tenke iha laran moos, laran ne’ebé di’ak, atu sai ema di’ak iha sosiedade.

Notísia relevante:Setembru, IOB reativa aula prejensiál

“Atu kontribui ba nasaun ida-ne’e, ita presiza loke ita-nia hanoin ne’ebé mak luan. Ita bele loke serbisu rasik no ita bele halo serbisu sosiál,” Pedro Miguel Barreto Ximenes, hateten iha serimónia judisium ne’ebé hala’o iha kampus Fomento II, Díli, sábadu ne’e.

Iha parte lorokraik IOB mós sei realiza judisium ba fakuldade informasaun komunikasaun teknólogia no programa mestradu, hamutuk na’in-125.

Tuir planu, IOB sei hala’o graduasaun iha fulan outubru 2021.

Re-ativa aula prezensiál

Oras ne’e daudaun IOB, hahú ona aula prezensiál, maibé nafatin kumpri regra hosi Ministériu Saúde (MS) no Organizasaun Mundiál Saúde (OMS).

“IOB reativa ona aula iha semana kotuk, maibé implementasaun regra OMS ne’e rigorozu tebes. Sira ne’ebé tama mai área kampus, hotu-hotu tenke lori kartaun kinur, ne’ebé hatudu katak sira simu ona vasina, ida-ne’e de’it mak sira bele tama, no mantein nafatin medida sira seluk, hanesan uza mascara no fase liman,” Pedro Miguel Barreto Ximenes, hateten.

Oras ne’e-daudaun dosente no funsionáriu administrasaun ne’ebé simu ona vasina dahuluk ni’an to’o ona 95%, no falta 5% mak seida’uk simu, tanba inan isin-rua, no balun moras grave.

“Ba sira ne’ebé simu ona vasina doze daruka to’o ona 70%, ne’ebé ita iha ona kondisaun atu loke aula prezensiál,” nia informa.

Kona-bá estudante, balun ne’ebé ho idade 17 sira bele hatudu de’it sirania kartaun ne’ebé  define katak sira seidauk ba tinan 18 no bele tama aula, maibé sira ne’ebé moras todan, bele husu atestadu médiku iha sentru saúde atu bele asesu mós iha aula.

Totál estudante iha IOB, daudaun-ne’e hamutuk na’in 4.258 ho totál dosente hamutuk na’in 128.

Jornalista: Nelia Fernandes

Editór: Cipriano Colo

HAKEREK NO HATÁN

Please enter your comment!
Please enter your name here