Aviaun ZEESM. Imajen/twinotterarchive.

OÉ-CUSSE, 07 agostu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA), deside re-ativa operasaun ba aviaun Zona Ekonomia Espesiál Sosiál Merkadu (ZEESM), hosi Dili ba Oé-cusse, loro-loron ho folin billete tun (ideál).

Folin billete tun tanba, antes-ne’e viajen dala ida kada pasajeiru adultu selu $50, no ba labarik kiik selu $40.

Notísia relevante:Autoridade Hatún Folin Billete Aviaun ZEESM ba $25

“Tanba operasaun transporte marítima paradu, nune’e autoridade deside hatun folin billete. Pesoál-sira ne’ebé mai hosi instituisaun Estadu kada viajen sei selu $40, ema adultu sei selu $30, labarik idade 12 sei selu $20 no bebé selu $8. Operasaun sei hahú iha segunda 09 agostu,” Prezidente Autoridade RAEOA, Arsénio Paixão Bano, hateten ba jornalista Agência Tatoli via whatsApp, sábadu ne’e.

Parte autoridade RAEOA mós deside sei fó de’it autorizasaun ba pasajeiru-sira ne’ebé simu ona vasina dala-rua, sei kumpri de’it teste-swab no livre sirkulasaun.

Alende ne’e, sei la autoriza sira-ne’ebé seidauk simu vasina ka foin vasina dala ida, tenke submete ba kuarentena obrigatóriu durante loron 14, no tenke hetan karta autorizasaun hosi Sentru Integradu Jestaun Krize, bainhira viajen hosi Dili mai Oé-Cusse.

Tuir planu, Komisaun Prevensaun no Mitigasaun COVID-19 sei fó prioridade ba estudante-sira ne’ebé sai benefisiáriu ba bolsa hakbiit hosi Fundo Desenvolvimento Capitál Humano (FDCH) na’in 47, tenki fila ba Dili, nune’e bele hala’o estudu iha semana oin.

“Autoridade sei fó prioridade ba sira, aviaun sei halo operasaun iha segunda (09/08) viajen dala-rua,” nia hateten.

Polítika ne’e sei kontinua, depende ba rekoperasaun situasaun COVID-19, to’o Governu sentrál iha ona solusaun no desizaun ba operasaun transporte marítima.

Jornalista: Abílio Elo Nini

Editór: Cipriano Colo

HAKEREK NO HATÁN

Please enter your comment!
Please enter your name here