Vise Primeiru-Ministru no Ministru Planu no Ordenamentu, José Maria dos Reis hamutuk ho Ministra Negósiu Estranjeiru no Kooperasaun, Adaljiza Albertina Xavier Reis Magno . Imajen TATOLI/Egas Cristóvão

DILI, 06 agostu 2021 (TATOLI)—Xefe Delegasaun ba simeira Nasaun sira ne’ebé ko’alia lian-portugés (CPLP, sigla portugés), José Reis, hatete Prezidente Repúblika, Francisco Guterres Lú Olo, apresia Timor-Leste nian partisipasaun iha eventu importante ne’ebé hala’o iha Luanda, Angola.

José Reis hanesan mós Vise Primeiru-Ministru no Ministru ba Planu no Ordenamentu, hamutuk ho Ministra Negósiu Estranjeiru no Kooperasaun (MNEK), Adaljiza Magno, sesta ne’e hasoru Xefe Estadu iha Palásiu Prezidensiál Bairru Pité.

“Prezidente Repúblika, Francisco Guterres Lú Olo, apresia ho prezensa delegasaun iha simeira CPLP, no ba oin oinsá atu prepara di’ak liután”, José Reis ba jornalista sira hafoin hasoru malu ho Xefe Estadu.

Durante estadia iha diáspora, nia informa realiza enkontru bilaterál iha Lisboa ho Sekretáriu Ezekutivu CPLP-nian, no selebra akordu mobilidade no deklarasaun iha Luanda.

Nia hatutan mobilidade ida-ne’e atu hametin liután kooperasaun entre CPLP sira iha área edukasaun, saúde, kultura no kooperasaun sira seluk.

“Ida-ne’e fasilita ita ba-mai nasaun ida ba nasaun seluk, en-termu kooperasaun edukasaun, saúde, kultura no kooperasaun sira seluk, para fasilita projetu fiksu”, katak nia.

Nia hatutan tan: “akordu ne’e sei lori ba Konsellu Ministru aprova depois lori fali ba Parlamentu Nasionál ratifika hafoin mak ita halo negosisaun entre nasaun ida ba nasaun seluk entre CPLP”.

Vise PM hatete durante enkontru ho Prezidente Angola, João Lourenço, nia mós entrega karta Prezidente Republika, Francisco Guterres Lú Olo, tanba labele partisipa iha simeira, Luanda.

Jornalista   : Osória Marques

Editór         : Cancio Ximenes

HAKEREK NO HATÁN

Please enter your comment!
Please enter your name here