Foto hamutuk: UNICEF no MSSI apoiu materiál kaixa feramentu saúde mentál hodi apoiu pisikososiál ba ONG Futuru, iha salaun ONG ba Futuru, sesta (06/08). Imajen Tatoli/Francisco Sony

DILI, 06 agostu 2021 (TATOLI)—Ministériu Solidaridade Sosiál no Inkluzaun (MSSI) hamutuk ho Fundu Internasionál hosi Nasoins Unidas ba Labarik (UNICEF, sigla inglés), sesta ne’e iha Raikotu, fornese kaixa ferramentu saúde no apoiu psikososiál ba Organizasaun Naun Govermentál (ONG) Ba Futuru.

UNICEF no MSSI, hanesan parte ida hosi programa reforsa forsa servisu bein-estar sosiál, dezenvolve kaixa ferramentu saúde mentál no apoiu psikososial hodi apoia labarik no família vulnerável sira no iha ambiente emerjénsia nia-laran.

Governu komprometidu atu enkoraja programa bazeia ha komunidade hodi prevene no hasoru violénsia doméstika abuzu no abandona labarik.

Tuir Diretór Jerál MSSI, Rui Gago Exposto, agradese ba parseiru nasionál no internasionál ne’ebé apoiu ona MSSI hodi bele rezolve problema ne’ebé iha.

Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto. Imajen Tatoli/Francisco Sony

“MSSI fiar no neon metin katak futuru kontinua servisu hamutuk, tanba ami mesak labele halo buat ida, maibé ita hotu nia forsa mak ita sei rezolve ne’ebé ita enfrenta.Tanba ne’e ita hamutuk iha futuru sei haforsa, hametin no asegura di’ak nune’e forte liután”, nia dehan.

Reprezenta Deputy UNICEF iha Timor-Leste, Emmanulle Collet, hatete apoiu ne’ebé mak oferese ho objetivu prevene no rezolve problema violénsia doméstika, abuzu no abandona labarik sira.

Nia hatete sasán ne’ebé mak fó apoiu hanesan pasta 150 ho materiál desportu-nian, brinkedu, materiál papelária sira. Hirak-ne’e atu fahe ba voluntáriu sira hodi halo atividade MHPS5 nian ho labarik sira iha komunidade afetadu sira iha fulan hirak oin mai.

“Emerjensia sira hanesan pandemia COVID-19, inundasaun hosi siklone seroja ho fatór protesaun labarik no familia sira-nia iha nível individuál, komunitáriu no sosiál. Sira iha tendénsia atu hatodan problema sira hanesan violénsia hasoru labarik sira, violénsia doméstika no probreza. Emerjénsia mós bele afeta labarik sira-nia bein-estar psikososiál”, nia tenik.

Kona-ba intervensaun ida hosi MHPSS, nia hatete hosi abril 2021, MSSI-UNICEF kolabora ho ONG ualu no organizasaun foinsa’e estabelese ona fatin ksolok ba labarik sira, fornese ba labarik sira iha sentru deslokasaun 13 (9 iha Dili no 4 iha Hera) ho oportunidade asesu ba jogu estruturadu sira, rekreasaun, no deskansa ida ho forma fortelese reziliénsia no fatór protesaun ezistente sira.

“Nune’e mós MSSI ho UNICEF sei fó formasaun ba Ofisiál Protesaun Labarik sira, GBV-Fokál Point, ajente saúde komunitária sira, reprezentante organizasaun relijioza sira no voluntáriu primeiru sokoru no kaixa feramentu MHPSS, atu bele reforsa servisu bein-estar sosiál sai ekipadu di’akliu hodi oferese apoiu psikososiál ba labarik no família sira”, nia hatete.

Diretora Ezekutiva ONG ba Futuru, Juliana de Oliveira Marcal. Imajen Tatoli/Francisco Sony

Diretora Ezekutivu ONG ba Futuru, Juliana de Oliveira Marcal, hatete ONG Futuru nia ekipa identifika ona no hela sentru evakuasaun lima lima ne’ebé sei eziste. Maibé ho programa ne’e hodi bele lori ba komunidade.

Nia dehan ekipa mós identifika komunidade 13 ne’ebé nafatin kontinua implementa atividade ida-ne’e.

“Ba futuru, implementasaun ida-ne’e sei la implementa mesak maibé ami sura ita hotu nia kontribuisaun no partisipasaun”, nia dehan.

Jornalista       : Osória Marques

Editór             : Cancio Ximenes

HAKEREK NO HATÁN

Please enter your comment!
Please enter your name here