Ministru Finansa, Rui Augusto Gomes, no Diretór Misaun, Sunil Mitra, asina akordu finansiamentu projetu infraestrutura, iha salaun Ministériu Finansa, Aitarak-laran, sesta (06/08). Imajen/MF

DILI, 06 agostu 2021 (TATOLI)–Ministru Finansa, Rui Augusto Gomes, reprezenta Estadu Timor-Leste no Diretór Misaun, Sunil Mitra, Reprezenta Banku Dezenvolvimentu Aziátiku (ADB, sigla Inglés), asina akordu kontribuisaun finanseira ba dahuluk iha área bee no saneamentu.

Konstrusaun ne’ebé sustentável no inkluzivu ne’e sei realiza iha munisípiu Lautém, Manufahi no Viqueque, ho montante orsamentu millaun $50.

“Kuaze besik 60% hosi totál empréstimu Timor-Leste mai hosi ABD. Ida-ne’e hatudu Banku nia konfiansa ba Governu Timor-Leste liuhosi empréstimu, asisténsia téknika no grant, tanba ne’e Governu bele dezenvolve konetividade no investe iha kapitál umanu hodi hadi’a produtividade traballadór sira ne’ebé importante tebes ba kreximentu empregu no investimentu setór privadu,” Ministru Rui relata liuhosi nota ne’ebé Agência TATOLI asesu, sesta ne’e.

Notísia relevante: Timor-Leste no ADB sei selebra akordu kontribuisaun finanseira

Kompozisaun finanseira ne’e rasik kompostu hosi empréstimu ho montante millaun $47 no grant millaun $3, aleinde ne’e Estadu Timor-Leste sei kontribui millaun $12,5.

Nune’e, kontribuisaun finanseira ho montante totál millaun $62,5, ne’ebé sei aloka ba projetu fornesimentu bee no saneamentu ne’ebé benefisia ba populasaun hamutuk 62.000 iha munisípiu tolu.

Atu implementa projetu ne’e, sei realiza formasaun kona-ba planeamentu, jestaun projetu, jestaun patrimóniu, operasaun no manutensaun bee, jestaun finansa no kolesaun tarefa ba funsionáriu 50 (feto 8%) iha área água, saneamentu no ambiente.

Projetu ne’e rasik ho durasaun tinan ualu  no sei kompleta iha fulan-setembru 2028.

Nune’e, governante ne’e bolu atensaun ba liña ministériu relevante, ajénsia implementadór no autoridade lokál atu mellora prestasaun servisu iha nível baze, atu garante asisténsia no investimentu ezekuta tuir tempu bazeia ba termu referénsia ne’ebe prevee iha akordu, hodi ikus mai bele lori impaktu signifikativu no mudansa pozitivu ba timor-oan nia moris. 

seremónia selebra akordu ne’e, akompaña hosi Ministra Negósiu Estranjeiru no Kooperasaun, Adaljiza Magno, Ministru Obra Públika, Salvador Eugênio Soares dos Reis Pires no Vise-Ministru Estatál, Lino de Jesus Torrezão.

Antes ne’e, Konsellu Ministru atribui podér tomak ba Ministru Rui Augusto Gomes atu reprezenta Estadu asina akordu ho parseiru.

Jornalista  : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here