Rotulajen iha embalajen ai-han. Imajen/folhape

DILI, 06 agustu 2021 (TATOLI)-Prezidente TANE Konsumidór, António Ramos da Silva ’Naikoli’ husu ba loja na’in sira hodi fornese informasaun loloos iha embalajen produtu, nune’e konsumidór sira bele informadu kona-ba kontiúdu produtu ida molok atu sosa.

“TANE hasoru loja na’in sira esplika kona-ba importánsia no obrigatóriu iha rotulajen produtu ai-han no enkamiña denúnsia ba entidade Estadu sira. Loja barak hafoin ami hasoru sira muda kedan no promete tuir ezijénsia hosi konsumidór sira,” Prezidente hateten ba Agência TATOLI, iha ninia knaar fatin, Villa verde, sesta ne’e.

Naikoli mós husu informasaun produtu presiza uza dalen ne’ebé konsumidór sira bele komprende iha embalajen produtu, kona-ba kualidade, kuantidade, kompozisaun, garantia, prazu validade, risku ba saúde, seguransa ba konsumidór no seluk tan.

“TANE konsidera importánsia leitura iha rotulajen produtu ka bein sira tanba hanesan informasaun importante kona-ba saida mak ita konsumu, bele hatene ingrediente, informasaun nutrisionál tanba produtu ai-han ida bainhira laiha informasaun hirak ne’e bele fó impaktu ba saúde,” nia akresenta.

Biban ne’e, Prezidente TANE rekomenda ba konsumidór sira, molok atu sosa sasán ruma, tenke haree fali rotulajen iha embalajen produtu.

“Ida-ne’e importante tebes hodi evita konsekuénsia ba saúde, tanba ne’e bainhira laiha rotulu iha embalajen produtu, bele kontaktu TANE hodi ajuda defende imi-nia direitu no interese,” nia apela.

TANE durante ne’e simu denúnsia, keixa no lamentasaun oin-oin hosi konsumidór sira kona-ba laiha informasaun iha produtu lokál hanesan fore-rai no seluk tan inklui produtu ai-han importadu ne’ebé fa’an iha merkadu nasionál no informasaun kona-ba karaterístika produtu ho dalen ne’ebé konsumidór sira la komprende.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here