Diretór Sentru Formasaun Jurídika no Judisiáriu, Antoninho Gonçalves. Imajen TATOLI/Egas Cristovão.

DILI, 06 agostu 2021 (TATOLI)—Sentru Formasaun Jurídika no Judisiária (SFJJ), sei fó formasaun ba membru Polísia Nasionál Timor-Leste (PNTL) na’in 20, iha tempu badak.

“Ita simu pedidu hosi komandu jerál PNTL atu bele fó formasaun ba membru na’in 20. Tanba ne’e, ita prepara ona módulu no sei hahú iha tempu badak,” Diretór SFJJ, Antoninho Gonçalves, hateten ba jornalista Agência Tatoli, sesta ne’e.

Notísia relevante:SFJJ seidauk realiza teste ba formasaun kandidatu juiz

Formasaun ne’e sei hala’o durante semana rua ho matéria kona-bá lei penál, investigasaun kriminál, faze inkéritu, aplikasaun prátika lei kódigu estrada, prevensaun no krime kontra ordenasaun hanesan aplika infrasaun rodaviáriu.

Alende ne’e, iha mós matéria balun kona-bá ajente krime, krime públiku, krime semi-públiku, direitu keixa ho kestaun prátika no seluk tan ne’ebé sei hetan matéria iha aula no prátika diskusaun.

Importante mós atu bele fahe esperiénsia ba membru polísia-sira oinsá implementa iha terrenu, hodi kompreende di’ak liu-tán kona-bá lei penál.

SFJJ iha formadór internasionál na’in-rua  nu’udár  juiz no prokuradór mak sei fó formasaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here