Sekretáriu Estadu Formasaun Profesionál Empregu (SEFOPE), Alarico do Rosário, asina akordu ho reprezentante Sentru Formasaun Komputadór Balide, Madre Ivonia Belo, iha salaun SEFOPE, sesta (06/08). Imajen Tatoli/Francisco Sony

DILI, 06 agostu 2021 (TATOLI)—Sekretaria Estadu Formasaun Profisionál Empregu (SEFOPE), fó apoia fundu ba sentru formasaun 18 ne’ebé akreditadu hodi hatudu kualidade no fortifika formasaun ba joven sira.

“Sentru formasaun tenke hatudu kualidade no rezultadu ba formasaun, rezultadu ne’ebé di’ak, no ami prontu atu reforsa ita bo’ot sira, maibé imi mós tenke apoiu ami tomak, bainhira ami ba iha uma fukun ema labele hakilar ami,” Sekretáriu Estadu Formasaun Profisionál Empregu, Alarico do Rosario, dehan, hafoin entrega fundu ba sentru formasaun akreditadu iha edifísiu SEFOPE, Caicoli, sesta ne’e.

Tuir Alarico, totál orsamentu ne’ebé  oferese hosi fundu tranferénsia hamutuk $300.000 no Fundu Dezenvolvimentu Kapitál Umanu (FDCH, sigla portugés) $100.000

“Ita hotu hatene katak sentru formasaun 18 maka hetan apoiu hosi SEFOPE, la-haluhan mós ba kolega sentru formasaun sira ne’ebé maka la-hetan ne’e ami la-haluhan. Iha kada tinan ami sei buka dalan oinsá atubele reforsa ita bo’ot sira hotu, ne’ebé maka hetan ona apoiu no ida ne’ebé seidauk hetan,” nia katak.

Iha fatin hanesan, Diretór Jerál SEFOPE, Paulo Alvez, kongratula sentru formasaun ne’ebé hetan apoiu no konsidera apoiu ne’e nu’udar parte ida hosi programa prioridade Governu ba tinan 2022 ba setór edukasaun no formasaun profisionál.

“Se ita bo’ot sira haree orsamentu tinan-tinan, saúde no abitasaun, sosiál, investimentu ba setór privadu, agrikultór no konetividade, boa governasaun. Ha’u filafali ba objetivu hosi VIII Governu Konstitusionál ita tau pontu maka’as loos ba área formasaun no profisionál,” nia tenik.

Jornalista       : Natalino Costa

Editora           : Julia Chatarina

HAKEREK NO HATÁN

Please enter your comment!
Please enter your name here