Diretór Eskola Ensinu Báziku Sentrál númeru 1 Baucau no manan-na’in prémiu Maha Chakri hanesan mellor profesór tinan 2021, Vicente da Silva Marcal. Imajen TATOLI/Natalino Belo

BAUCAU, 06 agostu 2021 (TATOLI)—Diretór Eskola Ensinu Báziku Sentrál númeru 1 Baucau, Vicente da Silva Marcal, sai vensedór ba prémiu Maha Chakri, hanesan mellor profesór ba tinan 2021, tanba ne’e tempu badak Estadu Reinu Tailándia liuhosi Embaixada iha Timor-Leste sei realiza seremónia entrega prémiu.

Nune’e, manan-na’in sente haksolok no rekoñese susesu ne’ebé nia hetan liuhosi esforsu hamutuk entre alunu, profesór no inan-aman sira no komprometidu utiliza osan hosi prémiu hodi kontribui ba eskola.

“Ha’u atu sosa tratór hodi halo natar iha ha’u-nia rai Buruma ne’ebé luan tebes atu reforsa programa merenda eskolár no atu minimiza alunu drop out, tanba ikus mai alunu barak sai hosi uma la mai eskola tanba ho ekonomia ne’ebé fraku tebes,” Diretór eskola hateten iha resintu eskola, Tirilolo, Baucau, sesta ne’e.

Visente dehan, merenda eskolár sei suporta ba pre-eskolár Buruma, ensinu báziku turma 1 no 2, nune’e mós sei reabilita eskola ensinu báziku filial Lutu-mutu no pre-eskolár Buruma ne’ebé ho kondisaun ladún favorável, didin ho bebak no estudante sira tuur iha rai.

“Nu’udar diretór eskola, ha’u sente ladún dignu,” nia akresenta.

Prémiu ne’e oferese hosi Prinseza Maha Chakri Sirindhorn hosi Tailándia, hanesan medalla ida no osan hamutuk $10.000.

“Karik iha oportunidade no buat hotu la’o di’ak, Prinseza Tailándia Maha Chakri sei mai vizita,” Vicente hatutan.

Prémiu sei entrega iha 29 setembru

Iha fatin hanesan, Embaixadór Tailándia iha Timor-Leste, Ekapol Poolpipat, hateten, Tailándia nafatin iha kompromisu atu koopera ho Timor-Leste iha área edukasaun.

“Liuhosi aprezentasaun Profesór Vicente, dehan katak sei hadi’a eskola no hola tratór, maibé husu atu habelar liután koñesimentu profesór sira durante hanorin iha klase,” Ekapol enkoraja.

Prémiu mellor Profesór Maha Chakri, tuir loloos sei intrega direta hosi Prinseza Tailándia, maibé tanba situasaun pandemia, maka sei realiza seremónia entrega iha Embaixada Tailándia iha Dili, iha loron 29 setembru.

Aleinde ne’e, objetivu Embaixadór Ekapol vizita Eskola Ensinu Báziku Sentrál númeru 1 Baucau atu observa direta atividade estudante relasiona siénsia no atividade extra ne’ebé oferese hosi profesór inklui dedikasaun Profesór Vicente.

Vise-Ministru sente orgullu

Iha biban hanesan, Vise-Ministru Edukasaun Juventude ho Desportu (MEJD), António Guterres, urgullu ho Profesór Vicente, ne’ebé sai manan-na’in.

“Urgullu hanesan nasaun ne’ebé hetan rekoñesimentu ba ita-nia edukadór sira hosi Señora Prinseza,” Vise-Ministru apresia.

Tuir governante ne’e, Governu liuhosi MEJD halo kooperasaun ho Governu tailandéz ligadu ho asuntu atribuisaun prémiu, ho objetivu atu hasa’e kredibilidade profesór sira iha nível mundiál.

“Ida-ne’e hatudu Timor-Leste nia profesór mós la lakon kompete ho profesór hosi nasaun seluk, tanba ne’e ha’u mai vizita Baucau hodi haree kondisaun eskola no iha tempu hanesan apresia Profesór Vicente nu’udar mós diretór eskola ne’ebé selesionadu hanesan mellor profesór ba tinan 2021,” nia tenik.

Vise-Ministru mai vizita Eskola Ensinu Báziku Sentrál númeru 1 Baucau atu koordena no prepara seremónia atribuisaun prémiu iha Dili.

Nia konsidera, atribusaun prémiu ne’e bele fó motivasaun ba profesór sira iha Timor-Leste ne’ebé tuir dadus nasionál pur volta 14.000 resin.

Governante ne’e dehan, MEJD iha responsablidade boot kontinua fó promosaun, promove, formasaun hosi tinan ba tinan, tempu ba tempu, neneik ba bebeik nafatin mellora kualidade profesór sira tanba nu’udar save no sentru ba formasaun.

“Tailándia oferese prémiu ne’e nu’udar modelu janela ba edukasaun Timor-Leste,” António subliña.

Prinseza Tailándia, Maha Chakri kada tinan rua oferese prémiu mellor profesór sira iha nasaun 11 iha sudeste aziátiku, nune’e Profesór Vicente hanesan ema dahaat ne’ebé hetan prémiu ne’e.

Prinseza Maha Chakri hanesan oan hosi Liurai Tailándia ne’ebé mak fó atensaun másimu ba edukasaun no sai mos nu’udar dosente iha Universidade Militár iha Tailándia.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here