Prezidente RAEOA-ZEESM,TL, Arsénio Paixão Bano. Imajen TATOLI/Egas Cristóvão

OÉ-CUSSE, 06 agostu 2021 (TATOLI)-Prezidente Autoridade Rejiaun Administrativa Espesiál Oé-Cusse Ambenu (RAEOA), Arsénio Paixão Bano, afirma populasaun Oé-Cusse simu ona vasina dala rua bele halo movimentu iha rai-laran no rai-liur, importante kumpre teste-swab.

“Vasina dala rua autoridade autoriza bele la’o livre Dili-Oé-Cusse no ba liur, importante kumpre nafatin swabnose, kuandu vasina dala ida de’it no la-simu vasina, autoridade la-autoriza no tenke kumpre kuarentena loron 14”, Arsénio Bano haktuir iha seremonia inaugurasaun kuarentena iha Mahata, suku Costa, sub-rejiaun Pante Makasar, sesta ne’e.

Nia dehan RAEOA nian populasaun hamutuk rihun 41 seidauk simu vasina, nia espera to’o dezembru 2021 komunidade simu segundu doze bele to’o pursentu 70, nune’e RAEOA bele tama ona iha situasaun normál. Tanba ne’e, autoridade husu tenke vasina, nune’e selebrasaun misa iha igreja, eskola no merkadu sira bele funsiona nafatin.

“Oé-Cusse agora ita aplika ona regrás iha edifisíu públiku sira, katak kartaun vasina nu’udár dalan legál ba atendimentu públiku, ita hala’o ona regulamentu ne’e atu hetan atendimentu hosi autoridade, tenke hatudu kartaun vasina, entaun ba oin sé mak seidauk simu vasina, autoridade sei la autoriza atu halo konsultasaun ruma iha edifisiu públiku sira”, nia tenik.

Sekretáriu Rejionál Asuntu Saúde, Manuél da Costa, hatete totál partisipasaun komunidade simu vasina AstraZeneca iha doze dahuluk no segundu nian, RAEOA atinje ona pursentu 43 hosi totál populasaun idade 18 ba leten hamutuk 17.541 maka simu ona, falta rihun 41 maka seidauk simu.

Jornalista       : Abílio Elo Nini

Editór             : Cancio Ximenes