Ilustrusaun hosi www.sulinformacao.pt.

DILI, 06 agostu 2021 (TATOLI)-Diretóra Ezekutiva Green Training Center (GTC), Antónia Xavier Nunes, informa sentru ne’e hahú reativa formasaun prezensiál, maibé partisipasaun hosi formandu menus.

“Bainhira Governu hakotu konfinamentu obrigatóriu, ami mós komesa reativa ona aminia formasaun ne’e, tanba situasaun liga ho vasina, no swab, halo formandu barak iha munisípiu seida’uk filafali mai Dili to’o agora, nune’e halo partisipasaun hosi formandu sirania menus,” Antónia Xavier Nunes, hateten ba Agência Tatoli, iha nia knaarfatin, Kolmera, Díli, ohin.

Nia dehan tan, bainhira formasaun ne’e hahú, sentru ne’e fó sai informasaun liuhosi pajina sentru nian rasik, ho nune’e formandu sira bele filafali mai tuir formasaun, no nafatin halo mós prevensaun ba covid19.

“Ami nafatin kumpre medidas ne’ebé iha ona hanesan fase liman, uza maskara no halo distansiamentu fiziku, nune’e bele prevene virus Covid19”, nia hateten.

Green Training Center estabelese iha 2020, ne’ebé funda hosi Diretóra Ezekutivu, Antónia Xavier Nunes, ho objetivu transforma kapasidade ne’ebé iha ba joven sira, nune’e bele kapasita sirania aan ba futuru ho kualidade, kompetente no profesionál.

Área formasaun hanesan, lian inglés, portugués, administrasaun, komputadór, no Myob Accounting.

Totál formandu ne’ebé tuir formasaun iha 2020 to’o 2021 hamutuk na’in-60, hosi númeru ne’e mai hosi estudante no juventude en jerál. Enkuantu, totál formadór iha sentru ne’e hamutuk na’inhaat, hosi númeru ne’e mai hosi esperiénsia kada área iha sentru formasaun ne’e rasik.

Totál, númeru ba servisu iha Green Training Center seida’uk iha, tanba laiha dadus ba formandu sira ne’ebé hetan servisu.

“Ba servisu nian, ami la hatene, tanba formandu balun ne’ebé tuir formasaun termina ona, sira seidauk mai foti sertifikadu, ho nune’e ami la hatene na’in hira mak hetan ona servisu, no na’in hira mak la hetan servisu,” nia informa.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here