Artista husi grupu Gembel ida dezenvolve nia talentu hodi pinta hela iha parede iha área Lecidere Dili, Kinta 15 outubru 2020. Imajen Tatoli/Antonio Goncalves

DILI, 06 agostu 2021 (TATOLI)-Koordenador Pinta Gembel Art Colletive, Andre R. dos Santos,  hateten Gembel Art Colletive kapasita joven timoroan sira iha área arte, ho nune’e bele aumenta koñesimentu hodi dezenvolve ba futuru.

“Ami sira ne’e mai hosi background ho talentu ami idakidak nian, no sem akadémiku. Maske, ami mai ho aminia kapasidade simples, ami tau hamutuk hodi transforma filafali ba juventude ne’ebé hakarak mai aprende konaba arte nian,” Andre R. dos Santos, hateten ba Tatoli iha nia knaarfatin, Lecidere, ohin.

Gembel Art Colletive, fó formasaun konaba arte nian, maibé iha ne’ebá joven sira aprende iha área lubuk ida hanesan dezeñu, eskultura (ukir), impresaun (sablon), no halo mós estatua.

“Matéria ba dezeñu nian, ami fó báziku, hanesan ba dahuluk sira aprende dezeñu objetu, hanesan ami fó ba sira oinsá atu dezeñu água, no siñelus, hafoin sira hatene dezeñu, ami kontinua fó fali formasaun ba sira oinsá dezeñu tais, no oinsá dezeñu mós iha kanvas nian, ida ne’e mak durante ami fó ba sira,” nia katak.

Nia informa, hafoin sira aprende tiha ba dezeñu nian, Gembel Art Colletive fó mós formasaun ba formandu sira oinsá atu halo eskultura, impresaun no halo mós estatua ho simentu.

“Ami fó formasaun ukir nian ba formandu sira, hanesan oinsá sira halo ukir ho modelu iha armari lolon sira, no aprende mós halo ukir konabá fatin tau foto. Enkuantu ba fali iha sablon nian, ami fó formasaun ba sira oinsá atu sablon ema nia oin iha faru,” nia hateten.

Totál formandu ne’ebé tuir formasaun ba arte nian, dadaun ne’e hamutuk na’in10, hosi númeru ne’e mesak joven.

“Durante ne’e, itania alin sira tuir hela formasaun, maibé ho situasaun agora ami labele hala’o, tanbá ligadu ho situasaun pandemia Covid19,” nia katak.

Gembel Art Colletive, estabelese iha tinan 2015, ne’ebé funda hosi ema na’inneen, mesak juventude, objetivu hosi formasaun ne’e transforma koñesimentu ne’ebé iha ba joven foinsa’e sira, ho nune’e bele dezenvolve ba futuru.

Entretantu, hosi tinan 2015 to’o 2021, Gembel Art Colletive fó ona formasaun arte nian, ba formandu hamutuk 200resin. Hosi númeru ne’e na’in10 hetan ona servisu iha instituisaun Governu, halo negósiu rasik, no balun mós servisu iha Organizasaun Naun Govermentais (NGO).

Totál formadór ne’ebé fó formasaun hamutuk na’inlima, hosi númeru ne’e iha esperiénsia ba arte nian no formandu sira ne’ebé tuir formasaun iha Gembel Art Colletive mai hosi estudante no juventude en jerál. Enkuantu, membru hosi Gembel Art Colletive hamutuk na’in75, hosi númeru ne’e feto na’inualu, no mane na’in67.

Jornalista       : Nelia Fernandes

Editór             : Cancio Ximenes

HAKEREK NO HATÁN

Please enter your comment!
Please enter your name here