BAUCAU, 06 agostu 2021 (TATOLI)–Komandante Forsa Armada Pasífiku, Komandu Enjeñaria 412 no Forsa Ezersísiu Rezerva Estadu Unidu Amérika (EUA), Kolonel Santacroce, urgullu bainhira hatene istória luta independénsia Timor-Leste.
“Hamutuk ita buras liután iha ita-nia responsabilidade nu’udar militár no abilidade tátiku, hanesan bonus ida mai ami bele hetan koñesimentu barak kona-ba ita-bo’ot sira-nia istória no kultura ne’ebé furak, ita-bo’ot sira-nia espíritu lutadór hatudu momós hetan hosi líder sira rasik,” Komandante Forsa Armada Pasífiku, hateten, iha Lanud Baucau, sesta ne’e.
Notísia relevante: Ezersísiu konjunta ramata, Coliati espera bele kontinua iha futuru
Santacroce dehan, Forsa EUA hakarak atu mai iha Timor-Leste hodi hametin relasaun, haforsa parseria no susesu ezekuta ezersísiu bilaterál dahuluk ho FALINTIL-Forsa Defeza Timor-Leste (F-FDTL) Timor-Leste.
“Ho urgullu atu dehan katak ami sei fó ajudu barak liután, buat ne’ebé ita-bo’ot sira halo liu ona ami-nia espetasaun liuhosi ita-bo’ot nia treinamentu no prontidaun, ami aprende barak,” nia akresenta.
Komandante ne’e lori naran sarjentu mor hamutuk ho soldadu hotu, ho ondra rekoñese no fó prezente ba Komandante Komponente Terrestre, Tenente Koronel Reinaldi, ne’ebé nu’udar líder inspirativu no iha kompromisu klean ba misaun istóriku entre forsa rua.
“Hau hakarak fó ba ita-bo’ot símbolu kiik hosi ami-nia ekipa, hanesan símbolu ida hosi Komandu Enjeñaria 412, ne’ebé gravadu ho motto ‘harii hodi serví’,” Santacroce hatutan.
Jornalista : Natalino Belo
Editora : Julia Chatarina
