Enkaregadu Negósiu Embaixada no Embaixadór interinu EUA, Thomas Daley. Imajen TATOLI/Natalino Belo

BAUCAU, 06 agostu 2021 (TATOLI)—Enkaregadu Negósiu Embaixada no Embaixadór interinu Estadu Unidu Amérika (EUA), Thomas Daley, komprometidu kontinua apoia esersísiu militár entre FALINTIL-Forsa Defeza Timor-Leste (F-FDTL) no forsa amerikanu.

“Ezersísiu ne’e refleta EUA nia kompromisu fundamentál ba parseria, ami fiar katak ita hotu sei sai di’ak liután bainhira servisu hamutuk ho amigu no parseiru sira hodi rezolve dezafiu komum hirak ne’ebé ita hasoru no servisu hamutuk hodi konstrui futuru ne’ebé di’ak liután,” Embaixadór interinu hateten, durante seremónia enseramentu ezersísiu ‘dalan ba dame’ iha Komponente Terrestre, Lanud Baucau, sesta ne’e.

Notísia relevante: Ezersísiu konjunta ramata, Coliati espera bele kontinua iha futuru

Ezersísiu ne’e hanesan atividade ba dahuluk entre ezersísiu boot rua ‘dalan ba dame’ ka ‘Path to Peace’ no ezersísiu harii hamutuk, ne’ebé sai nu’udar marka importante iha momentu ne’ebé nasaun rua hametin relasaun bilaterál.

Nune’e, Embaixadór interinu agradese ba kolaborasaun F-FDTL hodi realiza ezersísiu konjunta entre forsa rua.

Tuir Thomas, durante atividade, ekipa hosi Komponente Terrestre F-FDTL sai uma-na’in ne’ebé di’ak tebes ba forsa amerikanu.

“Hau hakarak agradese Governu Timor-Leste liuhosi Ministériu Defeza no autoridade munisípiu Baucau, tanba permite ona ezersísiu ne’e bele kontinua ho seguru, maski hasoru dezafiu hanesan  pandemia,” nia akresenta.

Nia urgullu ba kolaborasaun forsa rua, ne’ebé servisu maka’as ho dedikasaun, nune’e nia iha esperansa bele realiza atividade hanesan iha futuru.

Matéria importante durante ezersísiu mak hanesan ponte tali, parseiru sukoru kombate, navigasaun terrestre, movimentu tátiku no interkámbiu tatika infantaria.

Ezersísiu konjunta ne’e foin ba dahuluk, ne’ebé realiza durante semana rua, hahú  loron 26 jullu no termina ohin iha Komponente Terrestre F-FDTL Lanud Baucau.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here