DILI, 05 agostu 2021 (TATOLI)-Prezidente Timor-Leste Debating Group (TLDG), Leónia L.Freitas, hateten nia parte oras ne’e sei kontinua fó formasaun ba formandu sira via online tanba Timor-Leste implementa hela Estadu Emerjénsia liga ho prevensaun surtu COVID-19.

“Formasaun ne’ebé ami realiza liuhosi online hanesan dahuluk ami fó sai informasaun liuhosi facebook, depois ami shared link iha ne’ebá hafoin sira akompaña informasaun liuhosi link ne’ebé ami públika,  no iha link ne’e rasik ami uza aplikasaun zoom no google meet hodi realiza formasaun ne’e,” Leónia L. Freitas, hateten ba Agência TATOLI, iha BairroPite, Díli, kinta ne’e.

TLDG durante ne’e oferese hela formasaun iha área mídia literasia no dezeñu projetu ba partisipantes  hamutuk ema na’in 250-resin.

 Husi númeru formandu Timor-Leste Debating Group ne’e, ema na’in 50 maihosi membru organizasaun ne’e rasik  no na’in 200  hosi estudante universitariu sira iha rai-laran.

“Ami fó formasaun konabá média literasi ne’e, ita haree iha tempu lockdown ne’e joven barak mak fahe informasaun arbiru, entaun ita fó formasaun ne’e ba sira, atu oinsá sira hatene konabá informasaun sira ne’e nia di’ak iha ne’ebé? no nia benefisiu hosi informasaun nian iha ne’ebé? Tanbá, ita haree iha tempu COVID19 halo eskola hotu paradu,  entaun liuhosi formasaun ne’e, atu ita koñese no hatene benefisiu hosi mídia sira ne’e,” nia hateten.

Tuir nia objetivu husi formasaun ne’e maka atu hasa’e koñesimentu no abilidade formandu sira ninian liliu iha iha área literasia mídia no dezeñu projetu  nune’e bele kontribui ba prosesu dezenvolvimentu ekonomia no informasaun iha rai-laran.

“Formasaun konabá dezeñu projetu, ami bolu fali joven sira ne’ebé iha ona esperiénsia halo projetu  no sira-nia projetu la’o ho susesu,” nia hatutan.

Leónia L.Freitas, hateten kona-ba dezeñu projetu ne’e atu oinsá hasa’e konsiénsia foinsa’e sira-nia liliu atu hamrik mesak hodi labele  sai dependensia, koa’lia kona-ba prosesu implementasaun projetu, no kria parseiru ho ema seluk, intermuz finanseira no asuntu seluk tan.

Entretantu, TimorLeste Debating Group (TLDG), estabelese ona iha loron 01 fulan-outubru 2018, hodi organiza ona debate ba joven sira ne’ebé hakarak aprende sai lideransa iha futuru.

Hahú tinan  husi tinan 2018 to’o 2021, nia relata TLDG  iha ona membru hamutuk ema na’in 80 kompostu husi estudante universitariu no én jerál foinsa’e sira.

Jornalista : Nelia Fernandes

Editór       : Agapito dos Santos

HAKEREK NO HATÁN

Please enter your comment!
Please enter your name here