Komandante PNTL, munisípiu Bobonaro, Superintendente Antoninho Mau-luta. Imajen Tatoli/Sérgio da Cruz.

BOBONARO, 05 agostu (TATOLI)—Autoridade seguransa Indonézia-nian identifika ona Timoroan na’in 600-resin tama ilegál no oras-ne’e  iha hela Atambua.

“Ha’u simu informasaun katak, ita-nia joven na’in 600-resin ba tuir ezame arte marsiál iha Indonézia. Tanba ne’e, horikalan ita simu kedan orientasaun atu halo kontrolu makás iha fronteira,” Komandante Polísia Nasionál Timor Leste (PNTL), munisípiu Bobonaro, Superintendente Antoninho Mauluta, informa asuntu ne’e bainhira akompaña Ministra Saúde, Odete Maria Freitas Belo, hala’o diálogu ho populasaun iha suku Lour, postu administrativu Bobonaro, munisípiu Bobonaro, kinta ne’e.

Notísia relevante:Hakat ilegál iha fronteira, Governu sei aplika multa

Komandante ne’e mós simu ona informasaun hosi autoridade seguransa Indonézia-nian katak, tempu badak sei halo kapturasaun ba Timoroan hirak-ne’e, hodi deporta mai Timor-Leste, nune’e bele submete ba prosesu investigasaun.

Tanba ne’e, komandante ne’e apela ba autoridade lokál, populasaun iha fronteira atu koopera ho seguransa, hodi halo kontrolu ba sidadaun hirak-ne’ebé tama iha Atambua, labele hakat ilegál fila-mai TL.

“Agora ba oin ha’u orienta membru-sira atu taka dalan metin, nune’e sira labele tama ilegál. Ita-nia seguransa sei metin liu tán. Ida-ne’e ita husik sira tama sei lori moras foun mai ita,” nia esplika.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here