Ministru Prezidénsia Konsellu Ministru, Fidelis Manuel Leite Magalhães, hasai foto hamutuk ho kargu diresaun no xefia CAC hafoin seremónia pose, iha edifísiu CAC, Farol, kinta (05/08). Imajen TATOLI/Francisco Sony

DILI, 05 agostu 2021 (TATOLI)—Ministru Prezidénsia Konsellu Ministru, Fidelis Manuel Leite Magalhães, husu ba kargu diresaun no xefia Komisaun Antí Korrupsaun (CAC, sigla portugés) ne’ebé simu pose atu haree ba kapasidade institusionál.

“Knaar ne’ebé simu, ninia perspetiva haree ba uma-laran no haree ba kapasidade institusionál ne’e rasik, haree oinsá atu moderniza no kapasita di’ak liután CAC. Aleinde ne’e, haree ba servisu sira iha li’ur ne’ebé importante tebes hanesan investigasaun,” Ministru Fidelis hateten iha ámbitu seremónia pose, iha edifísiu CAC, Farol, kinta ne’e.

Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Francisco Sony

Governante ne’e nota mós katak, orgaun independente ne’e iha mudansa barak hafoin harii besik dékada ida, tanba ne’e atu luta kontra korrupsaun, kuadru sira ne’ebé profisionál no treinadu iha kbiit tomak halo servisu.

Ministru husu CAC sai hanesan balkaun ba efisiénsia, boa governasaun no jestaun atu hala’o knaar hanesan orgaun independente ne’ebé maka espesializadu ba krime korrupsaun.

Iha sorin seluk, nia konsidera, bainhira tama ona implementasaun lei, kuadru legál presiza iha vontade, hetan apoiu polítiku no iha kapasidade institusionál, tanba dala-barak harii instituisaun maibé laiha nehan, ikus mai instituisaun sira la hetan konfiansa hosi povu no la konsege halo servisu ho di’ak.

“Ho ida-ne’e parte Governu komprometidu atu investe no hadi’a rekursu umanu iha kuadru administrasaun públika, ne’ebé mós relevante ba CAC, inklui garante kontinuasaun ba apoiu polítiku ba esforsu luta nasionál kontra korrupsaun,” nia subliña.

Ministru dehan, Governu sei servisu hamutuk ho CAC atu hadi’a kualidade instituisaun no garante funsiona espasu tomak ne’ebé públiku presiza, inklui protesaun tomak iha dezempeñu servisu.

Nune’e, Governu apresia CAC investe barak iha prevensaun tanba konsidera hanesan kestaun importante.

“Sein prevensaun, jerasaun foun sira aban bainrua preokupa liu ho konkista materiál,” nia tenik.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here