Komunidade simu vasina AstraZeneca iha Sentru Saúde Formoza, Dili, kuarta (04/08). Imajen Tatoli/Francisco Sony.

DILI, 05 agostu 2021 (TATOLI)-Primeiru-Ministru, Taur Matan Ruak, enkoraja populasaun munisípiu Ermera simu vasina, nune’e bele prevene virus Covid-19 ho varian delta, tanba pursentu 88 abitante Ermera ho idade 17 ba leten seidauk simu vasina.

“Ha’u enkoraja populasaun Ermera atu kombate moras ne’e tenke simu vasina no ita-nia vasina sei sufisiénte no ha’u preokupa tebes variante delta, tanba daudaun ne’e iha ona Indonézia”, Xefe Governu ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidensia Nicolau Lobato, Bairru Pite, kinta ne’e.

Xefe Ezekutivu informa, ema ho númeru pursentu 12 mak simu vasina iha munisípiu Ermera. Maibé munisípiu seluk hanesan Viqueque iha segunda lugar tuir Dili.

Maske nune’e, Governu Timor-Leste kontinua esforsu hodi forma servisu ho viziñu Indonézia atu kombate virus foun ne’e.

“Ita-nia Governu servisu no forma hela ho ita-nia viziñu Indonézia sira atu oinsá haforsa ita-nia kapasidade atu kontrola pasajen ilegál sira iha fronteira”, PM dehan.

PM Taur hatutan Governu deside no aplika serka sanitária iha Ermera, maibé populasaun Ermera mós depende loos mak kafé, entaun Governu presiza tau atensaun ba difikuldade ne’ebé sira enfrenta iha pandemia ne’e.

Kona-ba medida serka sanitária no konfinamentu domisiliáriu iha postu rua munisípiu Ermera nian, Xefe Governu esplika, Governu toma hela atensaun ba situasaun ne’e hodi buka posibilidade, tanba Ermera hanesan Munisípiu produtór kafé. Tanba ne’e, Xefe Governu sujere dalan di’ak liu mak populasaun sira tenke simu vasina atu iha flexibilidade ba regra.

Munisípiu Ermera to’o loron 4 fulan-agostu tinan 2021 rejista ona kazu pozitivu Covid-19 kumulativu hamutuk 736, númeru rua hafoin munisípiu Dili, no daudaun ne’e sei iha kazu ativu 589.

Jornalista         : Osória Marques

Editór              : Cancio Ximenes

HAKEREK NO HATÁN

Please enter your comment!
Please enter your name here