Ministra Saúde, Odete Maria Freitas Belo. Imajen Tatoli /Egas Cristovão.

BOBONARO, 05 agostu 2021 (TATOLI)—Governu sei la fó kompensasaun ba família, bainhira laiha evidénsia ruma ne’ebé justifika katak, matebian Hilária de Jesus hakotu-iis kauza hosi vasina AstraZeneca.

Ministra Saúde, Odete Maria Freitas Belo, hato’o asuntu ne’e bainhira hala’o diálogu ho populasaun suku Lour no família matebian Hilária de Jesus, ne’ebé hakotu-iis hafoin simu vasina AstraZeneca iha 30 juñu.

Notísia relevante:PNTL re-investiga Hilária de Jesus nia-mate

“Ha’u agradese ba família tanba koopera ona ho ami. Maibé, ha’u atu hateten de’it katak, bainhira ita laiha evidénsia-ruma, susar tebes ita atu asesu ba kompensasaun. Agora ne’e sei iha hela faze diskusaun, bainhira Konsellu Ministru aprova ona mós, ita sei hein Prezidente Repúblika promulga mak foin bele implementa,” nia hateten, iha kinta ne’e.

Governante ne’e afirma, Governu laiha intensaun uza vasina AstraZeneca atu hamate matebian Hilária de Jesus, no mós polulasaun iha Timor-laran tomak, maibé atu salva povu hosi surtu COVID-19 ne’ebé mundu tomak enfrenta.

Ministra ne’e esplika, bainhira atu klarifika ba públiku kona-bá kauza hosi matebian Hilária de Jesus nia mate, dalan úniku mak tenke halo autopsia, nune’e bele hatene loloos, tanba dadus medical record matebian halo tratamentu saúde dala ida iha 2016 ne’e la deteta moras ruma, nune’e difísil atu halo investigasaun, bainhira laiha dokumentu saúde.

Odeta Maria Freitas Belo mós fó liberdade ba família matebian atu hato’o keixa ba parte hotu-hotu, bainhira la satisfas ho akontesimentu ne’e.

Iha fatin hanesan, Jacarias Silva de Jesus, lakohi halo autopsia, maibé nafatin ejize ba Governu atu responsabiliza ba kazu ne’e.

Família mós rekoñese iha serimónia funerál hetan apoiu kaixaun hosi serbisu saúde munisipál Bobonaro ho orsamentu natón atu rekompensa ba despeza.

“Kona-bá autopsia, ami família la konkorda. Bainhira hakarak hatene evidénsia, nusa mak uluk ha’u-nia inan fatui ran ne’e médiku-sira lakohi foti kedan ba halo teste iha laboratóriu,” nia kestiona.

Notísia relevante:Hilária de Jesus hakotu-iis hafoin simu vasina AstraZeneca

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here