Joga Tasa 12 Novembru 2020, BOAVISTA FC kamizola metan-mutin manan KABLAKI FC. joga ne'e hala'o iha Estádiu Munisipál Dili, Sesta (20/11). Imajen Tatoli/António Gonçalves

DILI, 05 agostu 2021 (TATOLI) – Klube Segunda Divizaun Kablaki FC ho  Sporting Clubo de Timor, mezmu foin loron ida halo treinamentu hafoin fulan barak suspende hotu atividade tanba  pandemia COVID-19 no Estadu Emerjénsia, maibé klube rua-ne’e prepara an atu enfrenta jogu sira ne’ebé organiza hosi Federasaun Futeból Timor-Leste (FFTL)   ho Liga Futeból Timor-Leste (LFTL).

Notísia Relevante : DIT FC preparadu ba kualkér jogu

Jerente Kablaki FC, Ologario Nunes, ba Agência Tatoli iha kampu FFTL, Dili, informa Kablaki FC laiha alvu ba kualkér jogu sira-ne’e, maibé esforsu an atu hatudu jogu ida di’ak hodi asegura performansia klube ho jogadór-sira nian.

Iha fatin hanesan treinadór prinsipál Kablaki FC, João Fernandes, hateten  sira nafatin mantein ho jogadór anteriór tanba jogadór hirak ne’e mak sai xave ba klube.

Kablaki mós hanoin hela atu buka tan jogadór foun hodi reforsa jogu hanesan Kopa FFTL, Liga Futeból Timor – Leste (LFTL) no tasa 12 de Novembru.

Daudauk ne’e jogadór Kablaki nian hamutuk na’in-26, maibé ba sira seidauk sufisiente no sei aumenta liután no maioria jogadór kompleta ona vasina AstraZeneca ho Sinovac.

Sporting prepara jogadór tuir kondisaun

Hosi sorin seluk, Treinadór prinsipál klube Segunda Divizaun Sporting Clubo de Timor, Moises da Silva, hateten haree ba durasaun tempu ba jogu Kopa FFTL, Liga LFTL no Tasa 12 de Novembru ne’ebé besik daudauk ona, sira prepara jogadór tuir kondisaun ne’ebé iha.

“Ami foin ohin mak mai hamutuk atu hala’o treinamentu, jogu ne’e sei hala’o iha loron 20 agostu, ha’u hanoin, ida-ne’e tempu ida badak loos,” nia tenik iha kampu Dom Bosco, Comoro, Dili.

Sporting nia jogadór-sira maioria  vasina ona. Tanba ne’e, sira prontu atu kompete iha jogu mai ne’e.

Iha fatin hanesan jogadór Sporting, Elvis Maximiano, hateten durante  pandemia Covid-19 halo deskansa barak iha uma, maibé nafatin hala’o treinamentu indivíduu.

“Ita hatene durante Covid-1, ita labele book an, maibé iha uma ha’u nafatin book an, ne’ebé jogu komesa fali ona oportunidade di’ak,” nia hateten.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here