Ministru Administrasaun Estatál, Miguel Pereira de Carvalho. Imajen TATOLI/Egas Cristovão.

OÉ-CUSSE, 05 agostu 2021 (TATOLI)-Governu liuhosi Ministériu Administrasaun Estatál (MAE) kompromete kontinua apoia finanseira ba Programa Dezenvolvimentu Nasionál Suku (PNDS), iha teritoriu atu fasilita infraestrutura bázika ba komunidade iha área rurál.

Ministru Administrasaun Estatál (MAE), Miguel Pereira de Carvalho, hatete suku sira la’ós parte hosi administrasaun públika, tantu Governu sentrál, munisipál ho rejionál, tenki tau matan ba komunidade ne’ebé hela iha suku, tanba suku sira konstituido hosi pesoál sira hanesan uma asosiativa populasaun nian, no lei divizaun administrativa la-regula espesifikamente ba suku sira.

“Programa Nasionál Dezenvolvimentu Suku, Governu kada tinan hahú kedas 2013, liuliu tinan ne’e Governu sentrál komprometidu atu aloka orsamentu ba PNDS ne’e, ba suku hot-hotu iha Timor-Leste ho montante rihun $50 to’o rihun $75 kada tinan, hahú tinan ne’e”, Governante ne’e informa iha salaun administrasaun Numbei, suku Costa, sub-rejiaun Pante Makasar, kinta ne’e.

Nia dehan, 2021 Governu mesak de’it aloka orsamentu ba PNDS sira pór volta millaun $14, maibé tinan ne’e parseiru dezenvolvimentu sira hosi Austrália liuhosi embaxada iha Timor-Leste mós fó apoia hodi implementa PNDS hamutuk millaun $8, no osan ne’e balu aloka ba 12 munisipiu inklui RAEOA.

Nia hatutan, la’ós tinan ida ne’e de’it, 2020 Governu Austrália mós aloka orsamentu pór volta millaun $4 resin, finansia programa PNDS sira. Governu ho Governu Austrália haree katak dezenvolvimentu iha área rurál, ita bele haree no populasaun bele sente benefísiu direta hanesan bee-moos, irigasaun, estrada rurál no drainajen.

“Ida ne’e importante tebes, tanba halo diretamente ba povu iha suku sira, liuhosi Programa Nasionál Dezenvolvimentu Suku iha suku hot-hotu, nune’e Governu sentrál komprometidu sei kontinua aloka orsamentu nafatin ba suku hot-hotu iha 12 munisipiu inklui RAEOA, tanba tinan ne’e Governu Austrália apoia millaun $8 no tinan oin apoia pór volta milaun $13 itál nune’e bele finánsia projetu PNDS”, nia dehan.

Jornalista       : Abílio Elo Nini

Editór             : Cancio Ximenes

HAKEREK NO HATÁN

Please enter your comment!
Please enter your name here