Ministru Administrasaun Estatál (MAE), Miguel Pereira de Carvalho. Imajen/TATOLI

OÉ-CUSSE, 05 agostu 2021 (TATOLI)-Governu liuhosi Ministru Administrasaun Estatál (MAE), Miguel Pereira de Carvalho, iha kinta ne’e, husu ba lidér komunitária sira iha Rejiaun Administrativa Espesiál Oé-Cusse (RAEOA) atu kontribui  oinsá kombate informasaun falsa ka hoax nune’e komunidade sira bele bá simu ona vasina iha postu vasinasaun.

“Ha’u husu ba lidéransa komunitário sira, autoridade sira iha RAEOA atu halo mós servisu kontra informasaun falsu sira ne’bé mak hatauk ita nia populasaun sira ba vasina,” Miguel Pereira de Carvalho, apela ba lidér komunitária sira iha salaun administrasaun Numbei, Pante Makasar, kinta ne’e.

Tuir nia durante ne’e akontese ema balun lansa ona informasaun falsa ba públiku hodi hatauk komunidade atu  bá simu vasina ne’ebé maka Governu prepara iha postu vasinasaun.

Tanba ne’e, autoridade lokál hanesan Xefe Aldeia, Xefe Suku, Administradór postu to’o Prezidente Autoridade RAEOA iha obrigasaun no responsabilidade atu ajuda Governu Sentrál hodi esplika no mobiliza populasaun kona-ba benefisiu husi vasina COVID-19.

“Vasina ne’e seguru no vasina ne’e dalan di’akliu ba ita-nia imunidade ne’ebé natón atu filafali ba moris normál, tanba nasaun barak sira fila ba vida normál ona liuhosi vasinasaun,” nia hateten.

Populasaun hotu-hotu tenki kontribui hodi simu vasina tanba vasina dalan ida hodi hasa’e imunidade ema idaidak ba luta kombate transmisaun surtu COVID-19 iha Timor-Leste.

“Prioridade Governu maka tenke vasina, laiha tan meius seluk atu kombate moras ne’e, alende aplika regrás bázika ne’ebé fó sai hosi Ministério Saúde ho Organizasaun Saúde Mundiál (OMS), vasina maka bele salva no proteze aan iha hela fatin,” nia hateten.

Rejiaun Administrativa Espesiál Oé-Cusse Ambeno (RAEOA) ho totál suku hamutuk 18, aldeia 63 ho sub-rejiaun  haat maka Oésilo, Pasabe, Nítibe no Pante Makasar.

Entretantu, Governu liuhosi reuniaun Konsellu Ministru (KM) iha kuarta ne’e, deside hodi impoin serka sanitária iha suku Naimeco, sub-rejiaun Pante Makasar no suku Bobometo, sub-rejiaun Oésilo, Rejiaun Administrativa Espesiál Oé-cusse Ambeno (RAEOA), hahú tuku 00:00 loron 05 agostu 2021 to’o tuku 23:59 loron 18 agostu 2021.

Jornalista:Abílio Elo Nini

Editór:Agapito dos Santos

HAKEREK NO HATÁN

Please enter your comment!
Please enter your name here