DILI, 05 agostu 2021 (TATOLI)—Funsionáriu na’in 11 hosi Komisaun Anti Korrupsaun (CAC sígla portugés), simu pose hodi asume kargu xefia ba periúdu 2021-2023.
Emposadu hirak-ne’e hetan nomeasaun hosi Komisáriu CAC, Sérgio Hornai ho koordenasaun Komisaun Funsaun Públika (KFP).
Notísia relevante:Janeiru-juñu, CAC investiga kazu korrupsaun 52
Sira ne’ebé assume kargu xefia sei hala’o kna’ar iha diresaun tolu mak hanesan Diresaun Investigasaun Kriminál (DI), Diresaun Prevensaun no Sensibilizasaun (DPS) no Diresaun Serbisu Apoiu no Kooperasaun (DSAK).
Komisáriu CAC, Sérgio Hornai, hateten serimónia pose ne’e hanesan pasu ida tán hosi instituisaun ne’e nian atu halo ezersísiu ba konsolidasaun Estadu.
“Emposadu-sira espresa emosaun no prontidaun atu kontribui ba instituisaun liu-liu halo eradiksaun polítika kombate kriminalidade korrupsaun,” Sérgio Hornai, hateten iha diskursu serimónia pose ne’ebé hala’o iha edifísiu CAC, Faról, kinta ne’e.
Ho juramentu ne’e, nia dehan, emposadu-sira hatudu responsabilidade boot iha loron ba loron buka esforsu oinsa kompleta estrutura, nune’e bele fó énfaze maka’as ba asaun instituisaun, hodi empeña polítika prevensaun ho investigasaun no kriminalidade.
Sérgio Hornai kompromete iha mandatu halo artikulasaun serbisu ho loloos, atu fortalese instituisaun ne’e nia ezisténsia atu presta serbisu ho di’ak liu-tán.
“Tinan sanulu ona, CAC lori progresu lubuk iha investigasaun kriminalidade no halo esforsu makás ba iha desiminasaun ka divulgasaun sira atu konsiensializa sidadaun iha setór públiku no privadu, oinsá kuidadu ba aktu poténsia ba risku korrupsaun,” nia subliña.
Lider másimu CAC ne’e, hatutan, dezafiu boot ho prezensa lei foun hanesan Medida Prevensaun no Konbate Korrupsaun (MPKK) ne’ebé lori responsabilidade ba emposadu hanesan deklarasaun rendimentu bens interese, serbisu balun la’o ona no lakleur tama ezekusaun, nune’e presiza ho kapasidade atu hala’o.
Iha fatin hanesan emposadu, Rosário Salsinha agradese ba konfiansa iha kargu diresaun no xefia sira hodi simu responsabilidade atu asegura nafatin polítika tomak instituisaun nian.
Lista espesialista Anti-Korrupsau (EAC sígla portugés) ne’ebé simu pose mak hanesan, José de Araújo Verdiál nu’udár Diretór lnvestigasaun, Luis Ersio de Jesus Ximenes Guterres, Diretór Apoiu no Kooperasaun, Emílio Freitas Quintas, Xefe Unidade lnvestigasaun Kriminál, Carlos Bento Mau Bere, Xefe Unidade Pessoál Apoio, no Rosário Salsinha, Diretór Prevensaun no Sensibilizasaun, Euclides Vidál Madeira, Xefe Unidade lnformasaun no Seguransa, Sérgio Gongalves, Xefe Unidade Planeamentu, Cirílio Hoas Loca Abi, Xefe Unidade Estudu no Avaliasaun, António Alves da Cruz, Xefe Unidade lnspesaun no Monitorizasaun.
Leonilda Rosa Soares, Xefe Unidade Promosaun no Valór lntegridade ho Maria Virginia Pereira da Costa Belo, xefe Unidade Jestaun Finanseira no Lojistika.
Partisipa iha serimónia pose ne’e, Ministru Prezidénsia Konsellu Ministru, Fidelis Magalhães, reprezentante Komisária Funsaun Públika no konvidadu sira seluk.
Jornalista: Nelson de Sousa
Editór: Cipriano Colo
