Atividade transaksaun entre komunidade ho negosiante-sira hosi Munisípiu Ermera, Liquiça no Bobonaro iha pontu entrada Tasi-Tolu, Dili, segunda (05/07/21). Imajen Tatoli/ dok.

DILI, 05 agostu 2021 (TATOLI)-Xefe Departamentu Merkadoria Munisípiu Dili, Berta Santa Gonçalves Vieira, husu komunidade evita sosa modo-tahan ne’ebé vendedór-sira fa’an iha rai ka trotoar-leten.

 “Servisu Jestaun Merkadu nian ho ita-nia seguransa destaka ona iha fatin-sira, hanesan Jardin Bairru-Pitté, Foho Osan Mean, Becora, Elemloi, no Kampung Baru, hodi kontrola komunidade labele fa’an modo-tahan iha trotoar-leten, maibé realidade ita-nia komunidade sempre kontra no kontinua fa’an, nune’e atu hapara dalan ida mak kompradór evita sosa sira-nia produtu ne’ebé tau iha rai,” Berta Santa Gonçalves Vieira haktuir Agência Tatoli iha Mascarinhas, Dili, kinta ne’e.

Ho situasaun COVID-19 ne’ebé daudaun ne’e transmisaun lokál, liuliu mosu tan ona variante Delta bainhira la haree no la kumpre protokolu  saúde públiku maka virus fasil da’et lalais. Tanba, dala barak vendedór sira fa’an iha trotoar-leten ne’e sira la hatene fatin refere mós ka lae.

Atu evita komunidade labele uza fatin públiku hodi fa’an sasán mak parte Jestaun Merkadoria nian hosi patrulla loro-loron kontinua hala’o atividade hodi kontrola fa’an sasán iha trotoar-leten.

“Liuliu iha Kampung Baru, Comoro, agora daudaun ne’e tempu loro-kraik hamosu engarrafamentu tanba komunidade fa’an modo-tahan no ropa obralan halo nakonu estrada-ibun, maibé iha tempu badak sei koopera ho Polísia Nasionál Timor-Leste (PNTL) Munisípiu Dili hodi hasai sira,” nia afirma.

Nia argumenta, ba vendedór sira ne’ebé kontinua fa’an iha trotoar-leten iha dekretu lei númeru 33/2008, 27 agostu iha artigu 5-7 ko’alia kona-bá bandu vendedór-sira fa’an iha dalan ka trotoar-leten.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here