Mapa Timor-Leste. Imajen/Espesiál

DILI, 05 agostu 2021 (TATOLI)-Ministériu Transporte no Komunikasaun (MTK) liuhosi Diresaun Nasionál Metrolojia no Jeofízika (DNMG, sigla protugés) alerta ba populasaun tau atensaun no kuidadu tanba razada anin boot akontese iha territóriu tomak, ho valór (02-30 km/h) no akompaña ho razada anin ho nia velosidade forte.

“Atensaun, razada anin boot akontese kuaze iha territóriu Timór laran hotu, ho intensidade hosi moderadu ba forte. Anin boot kauza hosi laloron tasi boot, liuliu iha Kosta Súl iha Viqueque, Covalima, Manufahi no Lautém,” refere nota ne’ebé Agência TATOLI asesu, kinta ne’e.

Enkuantu, ho tempreatura ár varia hosi 17-27 C iha rejiaun montaña sira no  hosi  22-29 C iha rejiaun kosteiru sira.

Ho kondisaun atmósfera atuál, tuir DNMG, bele fór risku no prejudika movimentu transporte marítima no atividade iha tasi laran ba peskadór no movimentu transporte terrestre.

Nune’e, tuir observasaun hosi satelite meteorolójiku Himawari-8, nota katak daudaun kondisaun atmósfera  maioria estável ka naroman, ho kalohan balun kuaze iha terrítoriu Timór laran hotu no laiha tendénsia atu udan, exeptu iha parte súl iha munisípiu Lautém, Viqueque no Natarbora (Manatuto) mak kalohan sei taka no posibilidade bele kauza udan xuviska iha parte dadeer.

Enkuantu, kondisaun lalaron iha kosta norte a’as varia hosi metru 0,5-1,3 (normál-moderadu) no kosta súl ho laloran nia a’as varia hosi metru 1,25-1,8 (moderadu).

Previzaun tempu lorokraik no kalan, hatudu iha parte meiu dia to’o kalan atmósfera maioria sei  instável ka kalohan sei taka kuaze iha territóriu Timór laran hotu no posibilidade bele kauza udan ho intensidade xuuviska-fraku prinsipalmente iha parte súl illa Timór.

Eventuál ne’e akontese tanba hetan influénsia hosi sistema meteorolíjiku balun, hanesan monsaun Austrália no efeitu hosi diferensa presaun ne’ebé atualmente observa iha territóriu Timór hodi impulsiona no intensifika briza marrítima.

Nune’e DNMG  informa laiha tendénsia ba udan extremu, maibé husu atu komunidade iha fatin ne’ebé alerta tenke nafatin kuidadu.

“Husu ba viajante ne’ebé desloka ba munisípiu sira, bainhira hala’o atividade presiza tau atensaun ba razada anin forte no kontinua hadook an hosi fatin risku hanesan ai-hun boot, liña eletrisidade, no seluk tan hodi evita ba dezastre ne’ebé ita la espera,” DNGM apela.

DNMG husu mós  ba populasaun hotu iha territóriu Timór laran atu evita sunu-rai arbiru tanba bele kauza espallamentu inséndiu ne’ebé hetan forsa hosi anin boot hodi lori risku ba ema seluk nia vida no kauza estragu ne’ebé boot ba meiu ambiente.

“Husu ba maluk viajante no peskadór sira iha parte marítima ne’ebé halo atividade ho ró-ahi, destinasaun Dili-Ataúro-Oé-cusse, espesialmente iha parte súl, atu toma atensaun ba onda tanba akompaña ho razada anin ne’ebé maka’as, entaun bele influénsia ba onda boot, nune’e kuidadu-an nafatin atu labele afeta vida,” Diresaun ne’e fó hanoin.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here