Ilustrasaun hosi www.jornalismo.iesb.br.

DILI, 05 Agostu 2021 (TATOLI)-Diretór Ezekutivu Sentru Dezenvolvimentu Inkluzivu TimorLeste (CDITL, sigla portugés), Martinho Guterres, informa dadaun ne’e CDITL fó hela formasaun ba mentór na’in10 hodi fó asisténsia ba labarik defisiénsia sira bainhira asesu ba ensinu públiku.

“Prosesu aprendizajen nia-laran, sira mós akompaña professór sira oinsá hatene nesesidade ema ho defisiénsia nian, liliu labarik ho defisiénsia”, Martinho Guterres ba Tatoli iha Becora, ohin.

Matéria ne’ebé mentór sira aprende, nia haktuir tenke hatene letra brille ba alin sira ho defisiénsia matan. Defisiénsia fizika, mentór sira aprende oinsá akompaña sira ne’ebé ho kadeira-roda, hanesan ba haris fatin, sira presiza tuir.

“Itania mentór sira mós tenke hatene lian jestuál, nune’e sira bele komunika ho alin defisiénsia tilun”, nia katak.

Durasaun ba formasaun fulanneen, hahú janeiru to’o juñu. Maibé, nia dehan formasaun seidauk termina, tanba Covid-19.

Totál mentór ne’ebé tuir formasaun ba área asisténsia nian hamutuk 10, hosi númeru ne’e mai hosi estudante universidade Dili laran.

CDITL mós fó formasaun hanesan, lian-inglés, portugés, komputadór, komunikasaun, administrasaun, no arte.

“Iha aminia formasaun ne’e ami loke ba públiku, hanesan ema ho defisiénsia, no la taka dalan mós ba maluk sira ne’ebé la ho defisiénsia sira, atu sira bele aumenta abilidade iha área formasaun ne’ebé ami fó”, nia hateten.

Nune’e nia esplika, sentru ne’e fó mós formasaun ba arte nian, formandu sira aprende konaba múzika, drama, no filmajen nian.

“Hosi formasaun ne’e, atu hasa’e koñesimentu ba ema ne’ebé ho defisiénsia no ema ne’ebé la ho defisiénsia, atu sira bele hatene karaktér oinsa sai aktór ba drama no filmagem nian. Ida ne’e mak dadaun ne’e ami halo, no agora ami prepara hela nia modolu atu fó ba sira”, Diretór ne’e dehan.

Organizasaun ne’e mós halo programa ba advokasia hanesan halo sosializasaun ba ratifikasaun konvensaun ba direitu ema ho defisiénsia, no inklui mós halo monitorizasaun no avalia ba implementasaun Governu sira, liuhosi ministériu hirak ne’ebé eziste, inklui Sekretáriu Estadu Juventude no Desportu (SEJD), oinsá implementa polítika nasionál, no planu nasionál ba asuntu ema ho defisiénsia nian.

“Ami mós sensibiliza komunidade atu ko’alia konabá lala’ok ka atividade hotu ne’ebé iha sosiedade no komunidade, liliu iha área remota, oinsá sira bele hatene konaba inklusivu ne’e”, nia informa.

Hosi estabelesimentu tinan 2017 to’o 2021, formandu hamutuk na’in100 mak tuir ona formasaun iha CDITL, hosi númeru ne’e mai hosi ema ho defisiénsia no ema la ho defisiénsia. Ba ema ho defisiénsia mai hosi munisípiu12, inklui Rejiaun Administrativa Espesiál Oé-Cusse Ambenu (RAEOA), enkuantu ema la ho defisiénsia mai hosi estudante no juventude en jerál.

Totál formandu ne’ebé hetan ona servisu hamutuk na’in17, hosi númeru ne’e mai hosi ema defisiénsia no ema la ho defisiénsia, no sira servisu iha CDITL, Instituisaun Governu, no Organizasaun Naun Govermentais (NGOsigla portugués). Enkuantu, totál formadór iha CDITL hamutuk na’inneen, hosi númeru ne’e na’intolu ema ho defisiénsia no na’intolu ema la ho defisiénsia.

CDITL harii iha 4 setembru 2017, inisia hosi ema ho defisiénsia na’in-rua, no ema la ho defisiénsia na’in-ida ho objetivu promove mudansa inklusaun sosiál, tanba dadaun ne’e asuntu defisiénsia sai hanesan asuntu ne’ebé ema barak hakarak atu ko’alia, liliu sosiedade, Governu, no Organizasaun Sosiedade Sivil sira, ko’alia barak kona-bá direitu ba ema ho defisiénsia.

“Ami la ko’alia direitu ba ema ho defisiénsia, maibé oinsá atu kria interesaun entre ema defisiénsia no ema la ho defisiénsia konaba ninia atividade sira, la iha separasaun ne’ebé sira iha liuhosi formasaun, maibé formasaun ne’e ho nia tipu inklusivu”, tenik.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here