Vice-MNEK, Julião da Silva, enkoraja komunidade Nipani atu simu vasina COVID-19. Imajen/Mídia RAEOA-ZEESM.

OÉ-CUSSE, 04 agostu 2021 (TATOLI)—Vise-Ministru Negósiu Estranjeiru no Kooperasaun, Julião da Silva, enkoraja komunidade Rejiaun Administrativa Espesiál Oé-Cusse Ambeno (RAEOA), atu koopera ho profisionál saúde hodi hakbesik-an ba fasilidade saúde simu vasina, nune’e bele prevene transmisaun COVID-19.

Notísia Relevante: Prevene variante Delta COVID-19, Atoni-oan hamutuk UPF hametin vijilánsia iha fronteira

“Ohin, ami mai iha-ne’e atu husu labele konsumu informasaun hoax kona-ba vasina ne’e oho ema, ida-ne’e bosok. Ita-nia Prezidente Repúblika ho Primeiru-Ministru simu ona vasina dala-rua. Komunidade bainhira maka ita simu, se ita hakarak viajen ba Dili livre hosi kuarentena entaun hakbesik ba ita-nia fasilidade saúde ne’ebé besik hodi simu vasina,” Governante ne’e hato’o mensajen iha Suku Nipani, Sub-Rejaiun Pante Makasar, Oé-Cusse, kuarte ne’e.

Nia hatutan, suku Nipani iha kedas fronteira Wini-Sakato, komunidade sira hela iha fatin risku boot tanba besik fronteira, tanba komunidade sira-ne’ebé hela iha fronteira besik ho sira sorin mesak família no halo vizita ba malu.

“Se imi hakarak vizita maluk sira sorin dalan mak tenke simu vasina dala-rua, tanba virus ne’e ita la hatene bainhira mak lakon. Entaun tenke prepara-an simu vasina hasa’e ita-nia imunidade hasoru moras ne’e, nune’e ita bele halo movimentasaun iha Oé-Cusse ba nasionál ne’e livre,” Vise MNEK ne’e fó hanoin.

Prezidente Autoridade RAEOA, Arsenio Paixão Bano, apela ba komunidade sira labele pániku, fiar ba autoridade no ekipa profisionál saúde hodi partisipa programa vasinasaun.

“Atu hasoru COVID-19 ne’e só vasina mak bele haforsa ita-nia imunidade atu kontra bainhira moras ne’e tama. Vasina ne’e importante tanba autoridade aban bairua sei presiza kartaun vasina bainhira halo konsultasaun ruma ho autoridade. Tanba, ita simu vasina ita bele proteje-an no proteje Timor-Leste,” nia fó hanoina ba komunidade sira.

Xefe Suku Nipani, Pedro Eco, aprezenta dadus populasaun iha suku Nipani simu ona vasina hamutuk na’in-500-resin.

“Ha’u-nia populasaun iha suku Nipani idade 18-60 ba leten hamutuk 1.417. Sira-ne’ebé simu ona vasina hamutuk na’in-512. Falta na’in-905 mak seidauk simu,” Xefe Suku ne’e hateten.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here