Vasina AstraZeneca. Imajen TATOLI/Francisco Sony

BAUCAU, 04 agostu 2021 (TATOLI)–Diretór Servisu Saúde Munisípiu Baucau, Domingos Reinaldo da Costa Guterres, hateten, sei halo promosaun ba estudante ho idade 18 ba leten (18+) hodi motiva bele partisipa kampaña vasinasaun.

“Hahú semana oin, ami hahú halo promosaun ba ensinu eskolár sira atu fó motivasaun ba estudante tinan 18 ba leten tenki simu hotu vasina,” Diretór Saúde munisipál ne’e informa ba Agência TATOLI, iha ninia knar fatin, kuarta ne’e.

Tuir Domingos, kampaña vasinasaun iha Baucau nia progresu la’o di’ak tanba komunidade hahú iha konsiénsia partisipa másimu iha atividade ne’e.

“Signifika hatudu informasaun di’ak ba komunidade atu partisipa vasinasaun no informasaun hoax ne’ebé espalla iha rede sosiál relasiona ho vasinasaun hahú menus ona, tanba ne’e komunidade hahú simu vasina. Ami pesóal saúde kontinua nafatin fahe informasaun no orienta komunidade ne’ebé seidauk hetan tenki simu vasina hotu,” nia akresenta.

Jeralmente, kampaña vasinasaun AstraZeneca iha munisípiu Baucau atinje ona 54%, hafoin lansa iha loron 12 juñu no komunidade ne’ebé seidauk vasina hamutuk 5.414.

Nune’e, Servisu Saúde munisipál kontinua orienta sentru no postu saúde sira hodi nafatin kontinua fó vasina ba komunidade sira ne’ebé seidauk no halo kompleta doze daruak.

Tuir dadus hosi Servisu Saúde Baucau, iha loron 02 agostu, totál komunidade ne’ebé partisipa ona kampaña hamutuk 25.154, kompostu doze dahuluk hamutuk 22.186 no doze daruak hamutuk 2.150, hosi alvu hamutuk 30.540.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here