Diretór Ezekutivu SERVE, Florêncio Sanches. Imajen TATOLI/Jogerjo Guterres

DIILI, 04 agostu 2021 (TATOLI)—Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, informa, foin lalais konsege aplika multa ba kompañia estranjeiru tanba la kumpre regra.

“Parte SERVE fó multa ba kompañia rua hosi Indonézia ne’ebé halo atividade ekonómika iha Timor-Leste, muda sede kompañia maibé la fó hatene ami, tanba ne’e ami fó multa ba kompañia rua ne’e maibé ha’u labele fó sai naran kompñia,” Diretór Ezekutivu SERVE informa ba Agência TATOLI, iha ninia knaar fatin, Palm Bussiness, Hudi laran, kuarta ne’e.

Nune’e, bazeia ba regra, aplika multa $5.000, suspende lisensa, no durante tinan-rua labele kompete konkursu públiku.

Tuir Diretór Ezekutivu ne’e, kompañia boot rua ne’e hetan konkursu Estadu millaun $70 iha área konstrusaun infraestrutura.

Kompañia ida muda atividade no muda sede la fó hateten SERVE, nune’e bainhira ekipa tuun direta ba terrenu, kompañia laiha ona fatin uluk.

Ba kestaun ne’e, Responsável ne’e husu ba kompañia nasionál no internasionál sira ne’ebé halo atividade ekonomia labele banati tuir hahalok hirak ne’e.

“Maluk sira ne’ebé hakarak halo mudansa ba sira-nia kompañia nia fatin, halo favór  fó hateten ba ami, nune’e ami bele hatene tanba se lae bele aplika multa, infelizmente ida-ne’e akontese ba kompañia boot sira ne’ebé toma konta ba projeitu boot iha Timór no hetan lukru boot, ikus mai muda fatin no a’at liu hafoin kaer projetu boot, sira fila ba sira-nia rai nonok,” nia hatutan.

Ba kestaun ne’e, parte SERVE tenta kontaktu ho kompañia maibé sira halo mate númeru.

“Ami husu númeru ba sira-nia Embaixada maka fó fali hodi komunika ba sira. Ita labele hanesan ne’e, ami sei aplika multa ba sira no ami la hakruk ba nein kompañia ida, ami tenke halo tuir saida mak hatuur iha lei,” nia tenik.

Iha fulan-jullu nia laran, SERVE taka atividade kompañia boot balun tanba razaun finansiamentu no labele kontinua atividade.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here